«Անընդհատ որ գոռում են՝ «մեզ ուզում են գյուլեն, սպանեն», վստահեցնում եմ՝ իրենք մեզ պետք են ողջ և առողջ, գյուլելով պատժելու ցանկություն չունենք»,- հուլիսի 10-ին դատարանի բակում, ուր ընթանում էր ՀՅԴ ՀԵՄ անդամ 18-ամյա Անդրանիկ Չամիչյանի գործով դատական նիստը, լրագրողների հետ զրույցում ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը՝ անդրադառնալով ՀՅԴ-ին վերագրվող իբրև «ահաբեկչություն» կազմակերպելու մեղադրանքներին:

«Դաշնակցականների տները խուզարկություններ անելը, նման մեթոդներով մեր հետ վարվելը նոր երևույթ չէ, անցնող հինգ տարվա մեջ պարբերաբար է եղել է, բայց հիմա ՀՅԴ երիտասարդներին մեղադրել ահաբեկչություն կազմակերպելու մեջ, մի նոր ծավալի, նոր մասշտաբի խուժանություն է, որն արվում է Նիկոլ Փաշինյանի հրահանգով և ուժային կառույցների անմիջական կազմակերպմամբ և մասնակցությամբ։ Նպատակը շատ պարզ է։ Դաշնակցությունը, որպես ազգային, համահայկական կուսակցություն, որպես կայացած համակարգ, սրանց հանձման և մեր պետականության վերացման քաղաքականության դեմ պայքարող հիմնական ուժերից է։ Սրանք փորձում են ձերբակալություններով, վարկաբեկելով մեկուսացնել Դաշնակցությանը՝ փորձելով ջարդել այն դիմադրության օջախները, որ գոյություն ունեն․․ Շատ կարճ ժամանակ հետո պարզվելու է, որ ոչ միայն ահաբեկչության նախապատրաստություն չկար, այլ նաև ամեն ինչ սարքված էր, նաև այն քննիչների, մարդկանց կողմից, ովքեր փորձում են այս ամենը վերագրել մեզ»,- ասաց Իշխան Սաղաթելյանը։

«Նիկոլ Փաշինյանի հետ ունեն գրավոր պայմանավորվածություն, այն կապիտուլյացիայի պայմանագիրը, որին Նիկոլ Փաշինյանն ասում է՝ «խաղաղության պայմանագիր», շատ հստակ այդ փաստաթղթում ձևակերպումները կան, որ ազգային ուժերին, այն ուժերին, որ փորձում են նաև ռևանշիստական անվանելով սահմանափակել նրանց գործունեությունը, Փաշինյանն ունի գրավոր պայմանավորվածություն Ալիևի հետ՝ այդ գործընթացը իրականացնելու համար, որովհետև ու՞մ համար պարզ և հայտնի չի, եթե կա Դաշնակցությունը, թուրքերն ու ադրբեջանցիները չեն կարող Հայաստանում իրենց լավ զգալ, չի կարող Հայաստանը թրքացվել։ Մենք 135 տարի պայքարել ենք մեր ժողովրդի իրավունքների, մեր պետության, անկախության, ինքնիշխանության համար, և այո՛, այդ պայքարը կանգ չի առնելու, որևէ կերպ կանգ չի կանգ առնելու, իսկ ինչ վերաբերվում է Դաշնակցության փակելուն, եթե այս երկրում մի բան պետք է փակվի ու գործունեությունը կասեցվի, դա՝ ՔՊ-ն է։ Իսկ փորձերը Դաշնակցությանը կասեցնելու այս 130 տարվա մեջ շատ են եղել, հիմա այդ փակողները չկան, բայց Դաշնակցությունը կա ու լինելու է, որովհետև մեր նպատակը բխում է մեր ժողովրդի հավաքական շահերից, մեր պետությունից, իսկ մենք բացի պետությունը պաշտպանելուց, այլ բան չենք արել»,- ասաց Իշխան Սաղաթելյանը։

«Դաշնակցությունը մեկ անձի, մեկ հոգու շուրջ ստեղծված խմբակ չէ՝ ի տարբերություն իրենց։ ՀՅԴ-ն ազգային, ընկերվարական, հեղափոխական կուսակցություն է, սա համակարգ է ու, այո՛, Դաշնակցությունը հայ ժողովրդի իմունիտետն է, որն իրենք չեն կարող կոտրել։ Չի՛ ստացվելու, մենք այս բռնաճնշումների միջով անցել ենք միշտ, անցնելու ենք, այստեղ առաջինը մեր պետությունն է, մեր հայրենիքն է ու դրա համար մենք ցանկացած զրկանքների և զոհողությունների պատրաստ ենք, հետևաբար այս ամենը կանգնելու է իրենց կոկորդին»,- նշեց Իշխան Սաղաթելյանը։

«Շատերը նաև լկտիաբար այս օրերին թիկունքից հարվածելով, ինչ-որ ամեն ինչ մանիպուլացնելով, թե իբր մենք ասում ենք՝ սպասեք ժողովուրդ, ոչ մի բան պետք չի անել, ես պարզ ասում եմ՝ ո՞վ իրավունք ունի, Հայաստանի ո՞ր քաղաքական ուժը կամ քաղաքական գործիչն է վաստակել այդ իրավունքը, որ կարող է Դաշնակցությանը, ինձ մեղադրել, որ մենք անցնող տարիների ընթացքում ոչ մի բան չենք արել, ասել ենք՝ ժողովուրդ ջան, նստեք, սպասեք։ Ես շատ-շատերին անվանական մեղադրելու իրավունք ունեմ։ Հիմա մի կողմից մեղադրում են, թե՝ ոչ մի բան չեք արել, մյուս կողմից էլ մեղադրում են՝ դե լավ, ինչ-որ շարժում եղել է, դուք եք համակարգել, ձախողել եք, էդ ո՞նց հասկանալ։ Չեմ ուզում ամեն մի փսլնքոտի անդրադառնամ, բայց մենք մեր անցած յուրաքանչյուր օրվա համար պարզ ճակատով մեր ժողովրդին կարող ենք բացատրություն տալ»,- ասաց ՀՅԴ ԳՄ ներկայացուցիչ Իշխան Սաղաթելյանը։ «Մենք պայքարել ենք, պայքարում ենք և պայքարելու ենք, իսկ ինչ վերաբերում է սրանց հեռացման ճանապարհներին, ասել եմ ու շարունակում եմ պնդել, պետք է հասնենք մի կետի, կազմակերպենք մեր ժողովրդին, համաժողովրդական ընդվզման միջոցով հեռացնենք այս իշխանություններին, դրա և՛ հնարավորությունները կա, և՛ ճանապարհը կա, պարզապես պետք է ֆեյսբուքից դուրս գալ, ժողովրդի հետ աշխատել, գործուն քայլեր ձեռնարկել և անկապ դիվիդենտներ կամ փիարվելու փոխարեն գործ անել ու հասնել այդ կետին․ ՀՅԴ-ն գնում է այդ ենք ճանապարհով»,-ասաց Իշխան Սաղաթելյանը։

Մանրամասները տեսանյութում