Հայ Յեղափոխական Դաշնակցության Երիտասարդական միության անդամները այսօր՝ հուլիսի 11-ին բողոքի ակցիա են իրականացրել Քննչական կոմիտեի շենքի դիմաց՝ ի պաշտպանություն իրենց ձերբակալված ընկերների։

Երիտասարդները ՔԿ էին բերել «սթրայքբոլ» խաղի համար նախատեսված աքսեսուարներ, ինչպես նաև շապիկներ, որոնց վրա գրված էր ՀՅԴ պատմական կարգախոսը՝ «Մահ կամ ազատություն»։ Նրանք նշել են, որ ՀՅԴ կարգախոսը շուրջ 130 տարվա պատմություն ունի և մաս է կազմում իրենց գաղափարական ժառանգության։

ՀՅԴ երիտասարդները կոչ են արել իշխանություններին դադարեցնել ընդդիմադիրների նկատմամբ քաղաքական հետապնդումները։

«Սիրելի՛ հայրենակիցներ, եթե ունեք ջրի ատրճանակներ, ամանորյա պայթուցիկներ, հրավառության որևէ նյութ, ապա ապահովված եք։ Բայց եթե ունեք ընդդիմադիր հայացքներ՝ դուք համարվում եք ահաբեկչություն նախապատրաստող։»

Նրանք նշել են, որ իրենց բերած իրերը ազատ վաճառվում են ցանկացած զինվորական կամ սպորտային խանութում։

«Կոչ ենք անում իրավապահներին զերծ մնալ ապօրինի և ծիծաղ առաջացնող գործունեությունից և անհապաղ ազատ արձակել մեր ձերբակալված ընկերներին», – հայտարարել են երիտասարդները։

Ակցիայի ավարտից հետո երիտասարդները ՔԿ Երեւանի վարչության շենքի մոտ են նետել իրենց հետ բերած իրերը՝ ՀՅԴ կարգախոս «Մահ կամ ազատություն» գրությամբ շապիկներ, «Սթրայքբոլ» խաղի համար նախատեսված խաղալիք զենքեր:

Անդրանիկ Չամիչյանին կալանավորել են զուտ նրա համար, որ սիրել է ստրայքբոլ խաղալ. լրագրողների հետ զրույցում ասել է ՀՅԴ Հայաստանի Երիտասարդական միության կենտրոնական վարչության ներկայացուցիչ Ժորա Ավդալյանը։

«Ոչ մի անօրինական բան չի ունեցել իր մոտ։ Այն ամեն ինչն, ինչ Անդրանիկ Չամիչյանը ունեցել է, ամեն պատահած խանութից կարելի է գնել։ Սա ուղղակի աբսուրդ է և ծիծաղելի։ Մյուս մեր ընկերների տնից հայտնաբերված իրերը նույնպես օրինական են։ Նույնիսկ հրապարակված նկարի կողքը այդ իրերի իրավունքները դրված են»,- նշել է նա:

Ըստ ՀՅԴ Հայաստանի ԳՄ անդամ, ԱԺ «Հայաստան» խմբակցության պատգամավոր Քրիստինե Վարդանյանի՝ սա Դաշնակցության դեմ արշավ է։

«Սա նրա համար չի, որ Անդրանիկ Չամիչյանին ձերբակալեն, դաշնակցականներից մի քանիսին ապօրինի զրկեն ազատությունից։ Սա դաշնակցության դեմ արշավ է, ինչպես եկեղեցու դեմ է արշավ իրականացվում։ Եվ այստեղ հարց է առաջանում՝ ինչու են սա իրականացնում, ինչ են անելու առաջիկայում, որ նման արշավների կարիք ունեն։

ՀՅԴ-ն փակելու մասին հայտարարություններն արվում են զուգահեռ այն գործողություններին, որոնք իրականացվում են, դրանով իսկ ցույց են տալիս, որ այս գործողություններն իրավական գործընթացների հետ կապ չունեն, ունեն քաղաքական նպատակ, քաղաքական դրդապատաճ, քաղաքական նպատակադրումներ»,- ասել է նա։

Մանրամասները՝ տեսանյութում