Հուլիսի 17-ին Հրապարակ TV-ի Հինգշաբթի հաղորդաշարի հյուրն էր ՀՅԴ անդամ, ՀՀ ԱԺ «Հայաստան» խմբակցության պատգամավոր Արթուր Խաչատրյանը: Անդրադարձ է կատարվել Ադրբեջանը Թուրքիային կապող անխոչընդոտ ճանապարհի տրամադրման հարցի պատմությանը և դրա մերօրյա մեկնաբանությանը, այսպես կոչված «Զանգեզուրի միջանցք» փաթեթավորմամբ: Արթուր Խաչատրյանի կարծիքով՝ արդեն իսկ հայտարարված պայմաններով նման ճանապարհի տրամադրումը ոչ այլ ինչ է, եթե ոչ ստրատեգիական մեծ նշանակության նոր տարածքային զիջում: «Դրա արդյունքում խախտվում է Հայ-իրանական սահմանը, անհասկանալի է, թե ինչ իրավունքներ պետք է ունենա Հայաստանն իր սուվերեն տարածքի այդ հատվածում, ոչինչ չի ասված, թե ինչ է ստանալու Հայաստանը դրա դիմաց»,- նշել է նա:

Արթուր Խաչատրյանը նաև ընդգծել է, որ ՀՀ իշխանություններն իրենց հերթական անհեռատես քայլով Հայաստանը դարձնում են տարածաշրջանային հզոր երկրների շահերի բախման կիզակետ, ինչը հղի է անվտանգային բազմաթիվ մարտահրավերներով: «Մեր պատմության ընթացքում մենք միշտ տուժել ենք, մասնատվել, երբ այստեղ բախվել են հզոր կայսրությունների շահերը՝ Հունաստան-Պարսկաստան, Թուրքիա-Պարսկաստան, Ռուսաստան-Թուրքիա-Պարսկաստան և այլն: Մինչդեռ այսօր էլ տարածաշրջանային շատ խաղացողներ՝ Թուրքիա, Ռուսաստան, Իրան, Չինաստան, ԱՄՆ, այստեղ ունեն ընդհանուր շահեր, որոնք կարող են նրանց մերձեցնել: Հենց դրա վրա պետք է խաղալ և ոչ թե նրանց միջև հակասությունները խորացնելու և սրելու»,- ասել է Արթուր Խաչատրյանը:

Անդրադարձ է կատարվել նաև ներհայաստանյան քաղաքական կյանքին և մասնավորապես վերջին շրջանի քաղաքական ռեպրեսիաներին, որոնք, ըստ Արթուր Խաչատրյանի, հետապնդում են իշխանության դիրքերն ընտրություններից առաջ ամրապնդելու, քաղաքական հակառակորդներին վախեցնելու և լռեցնելու նպատակներ: Նրա կարծիքով՝ Փաշինյանը պատրաստ է Հայաստանը դարձնել թուրք-ադրբեջանական խամաճիկ պետություն, միայն թե ինքն այնտեղ կարողանա իշխել:

Հարցին, թե ինչ վիճակ է ընդդիմադիր դաշտում, և արդյոք առաջիկա սեպտեմբերից ընդդիմությունը պատրաստվում է դիմադրության նոր ալիք բարձրացնել, Արթուր խաճատրյանը պատասխանել է. «Ես չեմ կարող ողջ ընդդիմության անունից խոսել, քանի որ ընդդիմադիր դաշտում այսօր կան ամենատարբեր քաղաքական ուժեր ու միավորներ, որոնք նույնիսկ միմյանց դեմ են պայքարում: Իսկ ինչ վերաբերում է «Հայաստան» դաշինքին և Դաշնակցությանը, կարող եմ ասել, որ համագործակցությունը շարունակվում է, իսկ ներքին պառակտումների մասին ասեկոսեները չեն համապատասխանում իրականությանը:

Մանրամասները՝ տեսանյութում