«Ակնհայտ է, որ քաղաքական խոսքի համար օրվա իշխանությունը հերթական անգամ օգտագործում է իր լծակները»։ Այս մասին Ավան և Նոր Նորք վարչական շրջանների ընդհանուր իրավասության դատարանի բակում լրագրողների հետ զրույցում ասաց ՀՅԴ անդամ, ԱԺ «Հայաստան» խմբակցության քարտուղար Արծվիկ Մինասյանը՝ խոսելով ԱԺ նախկին պատգամավոր Ռուբեն Հակոբյանի նկատմամբ հարուցված քրեական վարույթի և դատարանում քննվող կալանքի միջնորդության մասին։

«Բոլորին է հայտնի Ռուբեն Հակոբյանի՝ որպես քաղաքական գործչի քաղաքական սուր խոսքը, և դա գնահատելի է։ Ռուբեն Հակոբյանը հստակ արձանագրել է, որ եթե Սահմանադրությունը խախտող անձը չի կատարում Սահմանադրության կարևորագույն պահանջը՝ չի տալիս հրաժարական, ավելին՝ բռնություններով պահում է այդ իշխանությունը, ապա վրա է հասնում ժողովրդի կողմից իշխանությունը ստանձնելու սահմանադրական պարտականությունը։ Հակոբյանը խոսում է որպես ժողովրդի մի մաս, և ասում է այն, ինչ վերապահված է ժողովրդին։ Ժողովուրդը պետք է վերցնի իշխանությունն այն անձից, ով յուրացնում է այդ իշխանությունը։ Իսկ Նիկոլ Փաշինյանը յուրացնում է իշխանությունը»,–ասաց Մինասյանը։

Մանրամասները՝ տեսանյութում