Այսօր, Հուլիսի 25-ին IBIS Երևան Կենտրոն հյուրանոցի «Արարատ» սրահում տեղի ունեցավ ՀՅԴ անդամ, ՀՀ ԱԺ պատգամավոր Արթուր Խաչատրյանի «Արցախյան բանակցություններ» 1300 էջանոց երկհատորյակի շնորհանդեսը։

Ներկա էին հասարակական-քաղաքական գործիչներ, նախկին արտգործնախարարներ, ՀՀ Աժ պատգամավորներ, գիտնականներ։

Արթուր Խաչատրյանը ներկայացնելով աշխատանքը, ասաց, որ 2020 թվականի պատերազմից հետո Հայաստանի իշխանությունները շատ ինտենսիվ կերպով սկսեցին խեղաթյուրել թե Արցախյան շարժման պատմությունը, թե Արցախի Հանրապետության ձեւավորման պատմությունը։ Եվ ամենակարեւորը՝ խեղաթյուրեցին բանակցային գործընթացը, կարգավորման այն առաջարկները, որոնք դրված էին սեղանին։ «Հիմնական նպատակն էր ցույց տալ, որ Արցախի Հանրապետությունը կորցրել է անկախ լինելու գործնական եւ տեսական բոլոր հնարավորությունները։ Ես մտածեցի հոդված գրեմ, որովհետեւ միշտ զբաղվել եմ բանակցությունների եւ Արցախյան շարժման պատմությամբ։ Հետո հոդվածը երկարեց, մտածեցի գրել հոդվածաշար, հիմա դարձավ 1300 էջանոց երկհատորյակ, որի մեջ մոտ 3500 հղում կա։ Այսինքն՝ որեւէ խոսք, որ ասված է, օդից վերցված չէ, ամեն բառի համար պատրաստ եմ պատասխանատվություն կրել»,- նշեց նա։

«Այս աշխատությունը մեզ համար շատ կարևոր է քաղաքական իմաստով։ Այսօր, երբ Հայաստանի գործող ռեժիմը փորձում է խեղաթյուրել Ղարաբաղյան հակամարտության, Արցախյան շարժման ամբողջ էությունը և բովանդակությունը, ամբողջությամբ փորձում են խեղաթյուրել և կեղծել Արցախյան բանակցությունների բոլոր փուլերը, այս աշխատությունը շատ կարևոր է գիտահեն փաստերի հիման վրա իրականությունը ներկայացնելու և հակառակն ապացուցելու իմաստով»,- իր ելույթում ասաց ՀՅԴ Հայաստանի ԳՄ ներկայացուցիչ, ԱԺ պատգամավոր Իշխան Սաղաթելյանը։

Արթուր Խաչատրյանի գիրքը կարևոր է այսօր՝ Արցախյան հարցի նենգափոխման պայմաններում. իր խոսքում ասաց ԵՊՀ պատմության ֆակուլտետի դեկան Էդիկ Մինասյանը:

Ըստ Արցախի ԱԺ ՀՅԴ խմբակցության քարտուղար Վահրամ Բալայանի՝ սա երիտասարդների համար դասագիրք է հայրենական ոգով դաստիարակվելու համար: «Պետք է նշել, որ բավականին մեծ աշխատանք է կատարված, այս փաստաթղթերը մեզ թույլ են տալիս ասել, որ Արցախյան էջը փակված չէ, այդ փաստաթղթերը մեզ հուշում են, որ արցախահայությունը հայ ժողովրդի օժանդակությամբ իր պետականությունը վերակերտեց»,-ասաց նա։

Գրքի նշանակությունն իրենց խոսքում կարեւորեցին նաեւ նախկին արտգոծրնախարար Արա Այվազյանը, ՀՅԴ Բյուրոյի անդամ, ԱԺ պատգամավոր Լիլիթ Գալստյանը:

Մանրամասները yerkir.am-ի տեսանյութում