Անկախ նրանից՝ ադրբեջանgիներն ուզում են մարել հրդեհը, թե ոչ, պատասխանատու են բռնազավթված Արցախում տեղի ունեցող յուրաքանչյուր իրադարձության համար
28 Հուլիս 2025
«Անկախ նրանից՝ ադրբեջանցիները կարողանում են մարել հրդեհը, թե չեն կարողանում մարել, Ադրբեջանի Հանրապետությունը, որպես փաստացի վերահսկողություն իրականացանող երկիր Արցախի Հանրապետության տարածքների հանդեպ, պատասխանատու է այն ամենի համար, ինչը տեղի է ունենում Արցախում»,- Panorama.am-ի հետ զրույցում ասաց Արցախի Հանրապետության մշակույթի, երիտասարդության հարցերի և զբոսաշրջության նախկին նախարար, Արցախի բռնազավթված տարածքներում մշակութային ժառանգության պահպանության պետական խորհրդի քարտուղար Սերգեյ Շահվերդյանը՝ պատասխանելով հարցին՝ իրո՞ք ադրբեջանցիներին չի հաջողվում մարել իրենց կողմից օկուպացված Արցախում բռնկված հրդեհը, հաշվի առնելով, որ տարածքները դժվարամատչելի են, թե՞ ուղղակի չեն ուզում մարել՝ այդպես վնասելով Արցախի հուշարձանները, եկեղեցիներն ու բնական վայրերը։
Նա ընդգծեց, որ Ադրբեջանը պատասխանատու է Արցախի մշակութային, բնական ժառանգության պաշտպանության համար՝ անկախ նրանից, թե ինչ պատճառներով են վտանգվում հուշարձանները, բնական վայրերը։
«Անկախ նրանից, դժվար է, թե ոչ, ուզում են մարել, թե չեն ուզում մարել, Ադրբեջանն ամբողջական պատասխանտվություն է կրում Արցախի Հանրապետության բռնազավթված տարածքներում տեղի ունեցող յուրաքանչյուր իրադարձության համար»,- ասաց Ս.Շահվերդյանը։
Հիշեցնենք, որ Ադրբեջանն արդեն մի քանի օր է չի կարողանում մարել իր կողմից օկուպացված Արցախի Հանրապետությունում բռնկված խոշոր հրդեհը։ Այրվում են Ակնայի (Աղդամ) և Մարտակերտի մոտակայքում գտնվող անտառներն ու արոտավայրերը, հրդեհը շարունակում է տարածվել։
Այսօր Արցախի Հանրապետության մշակույթի նախարարությունն ահազանգեց՝ վերջին մեկ շաբաթվա ընթացքում Արցախի Հանրապետության արևելյան սահմանագոտում բռնկված հրդեհների հետևանքով վտանգված է շուրջ 100 պատմամշակութային հուշարձան։ Կրակի տարածման գոտում են հայտնվել Տիգրանակերտի պատմամշակութային արգելոցը, Ամարասի վանական համալիրը, ինչպես նաև Թալիշ համայնքի շրջակայքում և մի շարք այլ բնակավայրերում գտնվող նշանակալի հուշարձաններ, սոցիալական ցանցերում շրջանառվող տվյալների համաձայն, հրդեհի հետևանքով վնասվել են Նոր Շեն համայնքի պատմական թթի այգիները։ Կրակի տարածումը հասել է նաև Նախիջևանիկ և Սեյդիշեն համայնքներ, որոնց տարածքում գտնվող եկեղեցիներն ու մշակութային արժեք ներկայացնող այլ կառույցներ կանգնած են անմիջական վտանգի առաջ։
