Ազատության հրապարակում այսօր՝ սեպտեմբերի 2-ին տեղի ունեցավ Արցախի Անկախության օրվան նվիրված միասնության հանրահավաքը։

Հանրահավաքը մեկնարկեց Հայաստանի և Արցախի Հանրապետությունների օրհներգներով:

Ներկաները մեկ րոպե լռությամբ հարգեցին հայրենիքի պաշտպանության սուրբ գործին իրենց կյանքը նվիրաբերած հերոսների հիշատակը:

Շուշիի Սուրբ Ղազանչեցոց եկեղեցու հոգևոր հովիվ Տեր Անդրեաս քահանա Թավադյանը Տերունական աղոթք հնչեցրեց, ապա դիմեց ներկաներին. «Այսօր հավաքվել ենք հիշելու և օրհնելու Արցախի անկախության հռչակման 34-րդ տարեդարձը։ Սա օր է, որը մեզ հիշեցնում է ոչ միայն մեր ժողովրդի հաղթանակները, այլև մեր կրած ցավն ու խաչը»,- ասաց նա:

Ելույթներ ունեցան Արցախի հանրապետության պետնախարար Նժդեհ Իսկանդարյանը։, «Քաղաքական իրավունքների հայկական կենտրոնի» անդամ Նարե Սիմոնյանը, բժիշկ Հենրիկ Մարգարյանը, Արցախի Հանրապետության վաստակավոր արտիստ Սամվել Յեվրիյանը, «Ջենեսիս Արմենիա» ուղեղային կենտրոն–հիմնադրամի տնօրեն Աբրահամ Գասպարյանը, Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը, ՀՅԴ Բյուրոյի ներկայացուցիչ Արմեն Ռուստամյանը:

Հանրահավաքին ցուցադրվեց մի հատված, այսօր տեղի ունեցած «Արցախ․ չկարգավորված հակամարտություն, վերադարձի իրավունք» միջազգային խորհրդաժողովից, որի նպատակն էր արձանագրելու, որ արցախյան հիմնախնդիրը փակ չէ ոչ միայն ազգային, այլեւ միջազգային հարթակներում:

«Արդարությունն ու խաղաղությունը կլինեն, երբ իմ ուղերձը կամ ԱԺ հայտարարությունը ես հնարավորություն կունենամ կարդալ Ստեփանակերտի Վերածննդի հրապարակից»,-իր ելույյթում ասաց Մետաքսե Հակոբյանը։

Հայտարարելով որ Արցախի հարցը փակված չէ՝ Հակոբյանը շեշտեց, որ արցախցին տերն է իր հայրենիքի, իր պատմության, հոգևոր և մշակութային ժառանգության:

«Մեզ կարող են կալանավորեն, հալածեն, բռնաճնշումների ենթարկեն, բայց քանի դեռ հայը կանգուն է, ապա Արցախի հարցը փակված չէ»,-հայտարարեց Մետաքսե Հակոբյանը և որպես դրա ապացույց կարդաց Արցախի Հանրապետության ԱԺ արտահերթ նիստի ժամանակ ընդունված հայտարարությունը։

«Մեր իրավունքներից և շահերից հրաժարվելը առանց հստակ երաշխավորված հրադադարի կհանգեցնի հայոց ինքնության և հայոց պետականության կորստի, որը թուրք-ադրբեջանական տանդեմը համարում է պանթուրքիզմի ծրագրի իրականացման հիմնական խոչընդոտը։ Ներկայիս քաղաքականությունը Հայաստանի թուրքացման սպառնալիք է պարունակում»,- իր ելույթում ասաց ՀՅԴ Բյուրոյի ներկայացուցիչ Արմեն Ռուստամյանը:

«Անվերջ զիջումները չեն կարող հանգեցնել խաղաղության։ Դրան կարելի է հասնել միայն արդար որոշումների հիման վրա և ռազմաքաղաքական հավասարակշռությունը ապահովելով»,- նշեց ՀՅԴ Բյուրոյի ներկայացուցիչը:

Ըստ նրա՝ հաջողության և այս իրավիճակից դուրս գալու բանալին ազգի համախմբման մեջ է։

«Մենք նորահայտ փրկիչների կարիքը չունենք: Մեր միասնությանը եւ հարատեւությանը հասնելու լավագույն բանաձեւը մեզ փոխանցվել է Հայ Առաքելական եկեղեցու սպասավոր մեր Սուրբ հայրերի կողմից, որն ասում է. Ազատություն երկրորդական բաներում, Միություն՝ կարեւոր բաներում եւ Սեր՝ ամեն ինչում: Եւ ուրեմն՝ Միություն, Պայքար, Հաղթանակ»,- իր խոսքը եզրափակեց Ռուստամյանը։

Հանրահավաքի ավարտին հայրենասիրական երգերի կատարմամբ հանդես եկավ Ներսիկ Իսպիրյանը:

Տեսանյութն՝ այստեղ