Երեկվա հանրահավաքը նպատակ ուներ միջազգային հանրությանը ցույց տալու, որ հայ ժողովրդի հսկայական հատված միջազգային իր իրավունքը պահում է և հաստատակամ է դրանում, իրացնելու է դա, ԱԺ-ում լրագրողների հետ զրույցում, անդրադառնալով սեպտեմբերի 2-ի հանրահավաքին ասաց ՀՅԴ անդամ, «Հայաստան» խմբակցության պատգամավոր Արծվիկ Մինասյանը։

«Անկախ նրանից, որ օրվա իշխանությունն իրականացնում է հակահայ քաղաքականություն, թշնամու օրակարգի շրջանակներում կեղծ խաղղաղության ներքո զիջումների է գնում, անհնար է որևէ կերպ Արցախի ժողովրդի հիմնարար իրավունքն անտեսվի և ստորադասվի։ Իշխանափոխությունից հետո այն լինելու է օրակարգային, գլխավոր հարց»,-հավելեց նա։

Իր մանկության երազանքը կփշրվի բյուրեղի ապակու նման, և ես վստահ եմ՝ հենց ինքը և իր վայ քաղաքական թիմն են հայտնվելու ոչ միայն քաղաքական աղբանոցում, նաև համապատասխան քրեակատարողական հիմնարկներում. ասաց Արծվիկ Մինասյանը, անդրադառնալով վարչապետ Նիկոլ Փաշինյանի այն հայտարարությանը, թե 2026 թվականին գործող ընդդիմադիրներին ժոովուրդը ուղարկելու է քաղաքական աղբանոց:

Հարցին՝ չի կարծում, որ իշխանբության մատնանշած խաղաղության հետևից հանրությունը կգնա ու նորից ՔՊ-ին կընտրի, Մինասյանն ասաց.

«Բայց խաղաղություն չկա այդտեղ, այդտեղ կա կեղծ թեզ: Տեսեք՝ Արցախում ինչ խաղաղություն է, խաղաղությո՞ւն է, չէ՞, ո՛չ կրակոց կա, ո՛չ մարդասպանություն կա, խաղաղություն է, բայց հայություն չկա»։

Պատգամավորի խոսքով՝ ամենամեծ խաղաղություն ուզողն այսօրվա ազգային ընդդիմադիր հատվածն է:

«Ազգային ընդդիմությունն ավելի շուտ և շատ է ուզում խաղաղությունը, բայց այդ խաղաղությունը պիտի հիմնված լինի քո ազգի հարգանքի վրա, քո ազգի ապրելու իրավունքի սկզբունքի միջազգային ամբողջական համակարգի գործադրման սկզբունքի վրա, այլ ոչ թե ուղղակի օրվա իշխանության ցանկությունների և հայտարարությունների»,- ասաց նա։

Մինասյանը պնդեց, որ այսօր ժողովրդի ճնշող մեծամասնությունն իր ամբողջ էությամբ մերժում է սրանց:

Մանրամասն՝ տեսանյութում