Այսօր կառավարությունը որևէ բան չի անում, որպեսզի Հայաստանի տնտեսությունը պաշտպանի թուրքական էքսպանսիայից, առաջին հարվածը գալու է գյուղատնտեսության վրա, երկրորդը՝ տեքստիլի վրա. այսօր՝ հոկտեմբերի 13–ին, Աժ–ում լրագրողների հետ զրույցում նշեց ՀՅԴ անդամ, ԱԺ «Հայաստան» խմբակցության պատգամավոր Արթուր Խաչատրյանը՝ նկատելով, որ սրանք այն ոլորտներն են, որոնք մեծապես սոցիալական նշանակություն ունեն։

«Ես կարող եմ ձեզ ներկայացնել էկոնոմիկայի նախարարությանը իմ ուղարկած հարցումը և իմ պատասխանը, թե ինչ ազդեցություն է ունեցել Հայաստանի տնտեսության վրա 2021–ին թուրքական ապրանքների վրա ամբողջական էմբարգոն։ Մարդիկ հիմնավորել են, թե տնտեսությունը ինչքանով է դրանից դրական ազդակ ստացել, տեղական արտադրության զարգացում, ներմուծման փոխարինում տեղականի հաշվին, սեփական արտադրության ավելացում։ Այնպես որ ես կարծում եմ, որ էկոնոմիկայի նախարարությունը ճիշտ կլինի, որ հաշվարկ ներկայացնի։ Ես 2013–ին եղել եմ փորձագիտական խմբի անդամ և երբ Հայաստանը պատրաստում էր ԵՄ–ի հետ խորը և համապարփակ ազատ առևտրի գոտու համաձայնագիր կնքել, դա Հայաստանի վրա ի՞նչ ազդեցություն կունենա։ Նման հաշվարկ այսօր կառավարությունը չի ներկայացնում, որովհետև իրենք էլ են հասկանում, թե դա ինչով է հղի»,–ասաց նա։

Մենք խաղաղությանը դեմ չենք և հենց այդ պատճառով դեմ ենք Նիկոլ Փաշինյանին, որովհետև ինքը բերում է ոչ թե խաղաղություն, այլ բերել է պատերազմ և բերում է տառապանքներ և արտաքին ռիսկերի մեծացում. նշեց Արթուր Խաչատրյանը։

«Տեսեք Նիկոլ Փաշինյանը ինչ հոգեբանական տրյուկ է անում, ասում է՝ ինձ ընտրել է ժողովուրդը, ուրեմն եթե դեմ ես ինձ, դեմ ես ժողովրդին։ Չէ, ժողովրդին դեմ չենք, որովհետև դու ընտրվել ես լրիվ ուրիշ խոստումներով, և երկրորդը, քեզ ընտրել է ժողովրդի 27-28% -ը։ Ասում է՝ դեմ ես ինձ, ուրեմն դեմ ես խաղաղությանը։ Չէ, դեմ ենք քեզ, դեմ չենք խաղաղությանը»,–ասաց նա։

Փաշինյանի պնդմանը, թե կառավարության ծրագրում առաջնային տեղ է գրավել հենց խաղաղության հասնելը, ինչը ինքը կատարել է. նա նկատեց. «Այդ դեպքում իր ծրագիրը պետք է լիներ ընդամենը մի նախադասություն։ Իր ծրագրի մեջ կային էական հակասություններ։ Այն ժամանակ ինքը խաղաղությունը տեսնում էր Շուշիի և Հադրութի դեօկուպացիայի միջոցով, Արցախի հակամարտության կարգավորումը տեսնում էր «անջատում հանուն փրկության» բանաձևի մեջ։ Հիմա փոխվել է այդ ամեն ինչը։

Երկրորդը ի՞նչ խաղաղության մասին ենք մենք խոսում, եթե երկրի տարածքի մի էական հատված օկուպացված է թշնամու կողմից, երբ թշնամին լկտիաբար խառնվում է քո ներքին գործերի մեջ։ Օրինակ սահմանադրության փոփոխության պահանջը, դա միջամտություն է քո ներքին գործերին։

Ի՞նչ է նշանակում՝ ես բերել եմ խաղաղություն։ Ինչ ուզել է, զիջել ես, հիմա որ չզիջես, էլի կշարունակենք գնդակոծումը»։

Դիտարկմանը, որ Գևորգ Պապոյանն ասել է, որ այսպես թե այնպես թուրքական բրենդները այստեղ կան, այսինքն որևէ խնդիր չի լինելու, Խաչատրյանն արձագանքեց. «Դա նույնն է, որ ասես՝ դե միևնույն է թմրամոլությունը կա, այն օրինականացնենք, պրծենք, թեթևից սկսած մինչև ամենածանր օգտագործում են»։

Ես փոքր քաղաքական ուժերին ուզում եմ հիշեցնել 2021–ի ընտրությունները, երբ շանս չունեցող փոքր կուսակցությունները մասնակցեցին ընտրություններին, որի արդյունքում Նիկոլ Փաշինյանը, որ ստացել էր 53,8 տոկոս, այսօր ԱԺ–ում ունի 70 տոկոսից ավելի ներկայացվածություն. նշեց Արթուր Խաչատրյանը։

«Ես ուղղակի, քաղաքական ուժերին, որոնք իրական ընդդիմություն են եւ ցանկանալու են մասնակցել ընտրություններին, այդ վիճակագրությունը հիշեցնել»,–ասաց նա։

հարցին՝ իր հիշեցումը վերաբերում է նաև Սամվել Կարապետյանի՞ն, Արման Թաթոյանի՞ն, Խաչատրյանը պատասխանեց. «Գոնե Սամվել Կարապետյանը շատ ավելի մեծ ընտրազանգված ունի, քան թե փոքր կուսակցությունները, որոնք ստացել են, օրինակ, 12 000 քվե. Սամվել Կարապետյանին դա վստահաբար չի վերաբերվում, սոցիալական հարցումները ցույց են տալիս, որ ինքը բավականին մեծ ընտրազանգված ունի։ Արման Թաթոյանը պետք է ինքը որոշի՝ ոնց է գնալու։ Ամեն դեպքում ես բոլորին եմ դա հիշեցնում»։

Դիտարկմանը, որ «Մեր ձեւով» շարժման համակարգող Նարեկ Կարապետյանը հայտարարել է, որ Ռոբերտ Քոչարյանը չկա այն ցանկում, որի հետ իրենք կմիավորվեին, Արթուր Խաչատրյանն ասաց, որ իրենք այդ հայտարարությունն ընդունել են ի գիտություն. «Չեն ուզում, առանձին կանեն, մենք էլ առանձին կանենք։ Իսկ ինչի՞ պետք է ուզեին։ Սա նախընտրականի մասին է, իսկ հետընտրական զարգացումներում, ես կարծում եմ, որ կկրկնվի Գյումրիի սցենարը, որովհետեւ Փաշինյանին չսիրողներն ավելի շատ են, քան սիրողները»։

Ինչ վերաբերում է հարցին, թե արդյոք 2026–ի ընտրություններին ՀՅԴ–ն կմասնակցի Ռոբերտ Քոչարյանի հետ, թե առանձին, նա պատասխանեց, որ այդ հարցը պետք է որոշի ՀՅԴ Հայաստանի Գերագույն ժողովը։

Մանրամասները՝ տեսանյութում