Մի քանի օր է, ինչ Տավուշի մարզում, Գեղարքունիքի մարզում հրդեհները մոլեգնում են, մի քանի օր առաջ ճամբարակի հատվածում է շատ մեծ ցանքատարածություններ և անտառներ այրվում էին, այնուհետև կրակը տեղափոխվել է Տավուշի մարզ, Դիլիջան ազգային պարկի տարածք։ Այս մասին, այսօր՝ նոյեմբերի 26–ին, ԱԺ–ում լրագրողների հետ զրույցում նշեց ՀՅԴ անդամ, ԱԺ «Հայաստան» խմբակցության պատգամավոր Գառնիկ Դանիելյանը։

«Երեկ ինձ ահազանգեցին, որ չորս օջախ կա, դա Կազաչի հանդամաս կոչվող օջախն էր, մեկը «Լեռնային Հայաստան» հանգստյան տան վերևի հատվածն էր, երրորդը ոլորանների մոտ էր մեծ օջախ, և չորրորդը Սեմյոնովկա գյուղի հարակից հատվածում էր, որ սպառնում էր հասնել գյուղ։

Ամբողջ գիշեր աշխատանքներ են կատարվել և ի պատիվ փրկարարների և կամավորների անձնվեր աշխատանքի որոշակի արդյունքներ առավոտվա դրությամբ կար։ Այնտեղ, որտեղ ես գիշերը եղել եմ, այդտեղ հաջողվել է կրակը մարել։ Առավոտյան ինձ տեղեկացրեցին, որ ՊՆ–ի ուղղաթիռներ են ներգրավել։

Գիշերը ինչ-որ մի պահի թվում էր, որ արդեն հնարավոր չի կառավարել, որովհետև կրակը մեծ ուժգնությամբ մոտենում էր ներքևի հատվածներին, բայց փրկարարների պայքարը այս պահի դրությամբ իր պտուղները տվել է»,–ասաց պատգամավորը։

Անդրադառնալով պատճառներին, Գառնիկ Դանիելյանն ասաց. «Այն օջախները, որ կան, դրանք իրար հետ այդքան էլ կապված չեն, իրարից բավականին հեռու են, այսինքն տարբեր օջախներ են եղել։

Անմեղության կանխավարկածը չխախտելով, չեմ ուզում հիմա գնահատականներ տալ, որովհետև շատ նախնական կլինի և կարող է և այդքան էլ օբյեկտիվ չլինի, բայց ես ունեմ հիմնավոր կասկածներ իմ մեջ՝ հաշվի առնելով այդ իրավիճակը։ Ես այս ամեն ինչը պատահական բռնկված կրակ չեմ կարող համարել։ Այն, որ հրդեհները տարբեր տեղերում են, ինձ հիմնավոր կասկած տալիս է, որ որոշակի առումով մարդկային ներգործություն է եղել։ Անզգուշություն է, դիտավորություն է, թե ինչ է, պիտի պարզի քննությունը, բայց իմ խորին համոզմամբ, դա պատահական չի եղել, դա իմ կարծիքն է»։

Ընդդիմադիր պատգամավորը նկատեց, որ հրդեհի տարածմանը նպաստում է չոր խոտը, չորացած, քամատապալ ծառերը։

Հարցին՝ վտանգ կա՞, որ հրդեհը կտարածվի, թե՞ արդեն հիմնական օջախները մարված են, Դանիելյանը պատասխանեց. «Անգամ այն տեղերը, որ կրակը մարվել է, մերթ ընդ մերթ այդ մարած կրակը նորից բռնկվում է։ Քամին է նաև նպաստում։

Ես տեսա, որ բավականին շատ տեխնիկա, փրկարարներ Հայաստանի տարբեր մարզերից գիշերը համալրում էին և գալիս էին։ Իմ կարծիքն այն է, որ շատ ավելի ճիշտ կլիներ, որ այդ ամեն ինչը արվեր նախնական փուլում և այս ծավալները չընդգրկեր։ Ամեն դեպքում, էկոլոգիային, ֆլորային, բնությանը մեծ վնաս է հասցվել։ Դա Դիլիջան ազգային պարկի տարածքն է, ազգային պարկի տարածքն է։

Թե հիմա ո՞վ է շահագրգռված եղել, ի՞նչ է եղել, ես չեմ ուզում նախնական գնահատականներ տալ, բայց վարկածներ կան, որ իրավապահ համակարգը պիտի այդ վարկածների հետևից գնա, ստուգի, և մեղավորները պիտի խիստ պատասխանատվության արժանանան»։

Մանրամասները՝ տեսանյութում