ՀՅԴ գործունեությունը կասեցնելու որեւէ փորձ չի կարող հաջողել: Նման ցանկություն կամ նման մտադրություն ունեցող մարդիկ լավ չեն պատկերացնում՝ ինչ ասել է Դաշնակցություն: Եթե հասկանային Դաշնակցության էությունն ու մեր անցած ճանապարհը, կարծում եմ՝ իրենց նման արտահայտություններ թույլ չէին տա,- այսօր ՀՅԴ 135-ամյակին նվիրված հանդիսավոր միջոցառումից առաջ լրագրողներին ասաց ՀՅԴ Բյուրոյի անդամ Արսեն Համբարձումյանը՝ անդրադառնալով իրենց կուսակցությունը փակելու խոսակցություններին:

Համբարձումյանի խոսքով՝ ամենատարբեր ուժերի, ամենատարբեր պետությունների կողմից ՀՅԴ-ն կասեցնելու, թուլացնելու, լուսանցքից դուրս մղելու փորձեր են եղել, բայց որեւէ փորձ չի հաջողվել. «ՀՅԴ-ն շարունակում է իր երթը հակառակ այդ բոլոր մոտեցումների եւ ձեզ վստահեցնում եմ, որ որեւէ փորձ այդ ուղղությամբ չի կարող հաջողել»:

Նա նաեւ ասաց, որ այսօր իրենց առջեւ դրված գլխավոր խնդիրը ազգի ինքնության դեմ ուղղված ներքին ու արտաքին մարտահրավերներն են: Նրա խոսքով՝ այդ ուղղությամբ ազգային բոլոր ուժերը հսկայական անելիք ունեն: «Դժվար կլիներ երեւակայել, որ սեփական հայրենիքում անկախ պետականության պայմաններում հայկական ինքնության վտանգի խնդրի առջեւ կկանգնենք»,- ասաց Համբարձումյանը: