Այն, ինչ այսօր կատարվում է եկեղեցու դեմ, մաս է կազմում ՀՀ գործող իշխանությունների քաղաքական ուղեգծին` հարվածել մեր ազգային հարստությանը, ազգային արժեքներին։ Sputnik Արմենիայի հետ զրույցում նման տեսակետ հայտնեց ՀՅԴ Բյուրոյի Հայ դատի և քաղաքական հարցերի գրասենյակի ղեկավար Կիրո Մանոյանը։

Արդյոք հայկական սփյուռքն այս հարցում միասնական կարծիք ունի՞ հարցին Մանոյանը պատասխանեց` նշելով, որ հնարավոր չէ ունենալ մեկ միասնական կարծիք, քանի որ սփյուռքը մեկ կառույց չէ, և կան տարբեր տեսակետներ։

«Դրանով հանդերձ սփյուռքը` որպես ամբողջություն, կարծում եմ` եկեղեցու դերը ավելի լավ է ճանաչում. ինքն իր գոյությունը պահպանել է մի քանի կառույցի շնորհիվ, որոնցից հիմնականը եկեղեցին է եղել։ Ուրեմն և անհանգիստ է սփյուռքը, որ նման վերաբերմունք կա Հայաստանում Հայաստանյայց առաքելական եկեղեցու նկատմամբ»,– նշեց Մանոյանը։

Նրա խոսքով` իշխանությունները վատ են զգում, որ կա մի համահայկական կառույց` ի դեմս եկեղեցու, որը վայելում է ժողովրդի մեծամասնության վստահությունը։

Մանոյանը հնարավոր չի համարում եկեղեցու պառակտումը և հակաթոռի ստեղծումը, թեև չի բացառում, որ նման փորձեր կլինեն։

«Դա ծիծաղելի բան է, դա ոչինչ չի տա. իրական պառակտում թեմերի մեջ չի լինի կամ հակառակ կեցվածք չի որդեգրվի։ Խոսվում էի Միացյալ Նահանգների արևմտյան թեմի մասին և այն մասին, որ Հովնան արքեպիսկոպոսն է կաթողիկոսի` իշխանության թեկնածուն։ Հավանաբար դա է պատճառը, որ նա հրապարակային դեռ ոչինչ չի ասել, թեև իր անունը հայտնի ցուցակի մեջ կար, սակայն չէր ստորագրել։ Կարծես այդպիսով տեղ է թողնում հետ գալու»,– ընդգծեց ՀՅԴ Բյուրոյի Հայ դատի և քաղաքական հարցերի գրասենյակի ղեկավարը։

Բացի այդ, նա հիշեցրեց, որ այս օրերին պիտի կայանա եպիսկոպոսաց ժողովը, որը շատ հարցերի պատասխան կտա, սակայն ակնհայտ է, որ իշխանությունն ամեն ինչ անում է, որպեսզի այդ ժողովից բացակայեն սկզբունքային կեցվածք ցուցաբերած բոլոր եպիսկոպոսները, արքեպիսկոպոսները։

Sputnik Արմենիա
06.12.2025թ.