«Այս օրերին հստակ չէ, թե որտեղ է ավարտվում Ադրբեջանի իշխող վարչակարգի քաղաքականությունը և որտեղ է սկսվում Հայաստանի իշխող վարչակարգինը, բայց Հայ դատի հանձնախմբի ուղղությունը միշտ հստակ է եղել և այդպես էլ կմնա,»-Արցախի մասին գիրք նվիրելուց հետո Ցեղասպանության թանգարան-ինստիտուտի տնօրենի կողմից ԱՄՆ փոխնախագահ Ջեյ Դի Վենսին նվեր փոխանցելու և դրանից հետո տնօրենին աշխատանքից հեռացվելու ու Արցախի հարցը արտաքին քաղաքականությանը հակառակ համարելու Փաշինյանի պատճառաբանությանն անդրադառնալով,- այս մասին «Փաստինֆո»-ին ասաց, ԱՄՆ Վաշինգտոնի Հայ Դատի հանձնախմբի մամուլի խոսնակ Եղիսաբեթ Չուլջյանը։

Չուլջյանը նշեց, որ Արցախի հարցը՝ արցախահայության բռնի տեղահանությունից հետո բռնագաղթված բնակչության վերադարձի իրավունքը, հայ պատանդների ազատ արձակումը և Արցախի ցեղասպանության դեմ արդար լուծումը, Հայ Դատի հանձնախմբի օրակարգի առաջնագծում են, որովհետև դրանք հայ ազգի օրակարգի առաջնագծում են։

«Հայոց ցեղասպանության ճանաչումն ու արդար լուծումը Հայ Դատի հանձնախմբի օրակարգի առաջնագծում են, որովհետև դրանք հայ ազգի օրակարգի առաջնագծում են։

Հայաստանի ինքնիշխանությունն ու անվտանգությունը Հայ Դատի հանձնախմբի օրակարգի առաջնագծում են, որովհետև դրանք նույնպես հայ ազգի օրակարգի առաջնագծում են։

Առանց հաշվետվողականության, առանց արդարության և առանց միջազգային իրավունքի կիրառման, տևական խաղաղություն չի կարող լինել։

Եվ պատմությունը ցույց է տվել․ ո՛չ մի անհատ, ո՛չ մի իշխող կուսակցություն չի կարող կասեցնել հայ ազգի արդարության պահանջատիրական աշխատանքները»,- եզրափակեց Չուլջյանը։