Այսօր մարտի 16-ին,Կարեն Դեմիրճյանի անվան մարզահամերգային համալիրում տեղի ունեցավ «Հայաստան» դաշինքի ձեւաչափի հանրայնացման հանդիսավոր միջոցառումը։

Մասնակցում էին Դաշինքի անդամներ, համակիրներ, հրավիրյալներ:

Ելույթներով հանդես եկան՝ ՀՅԴ Հայաստանի ԳՄ ներկայացուցիչ ԱԺ «Հայաստան» խմբակցության պատգամավոր Իշխան Սաղաթելյանը, «Առաջ» աջակենտրոն կուսակցության ԿԳԿ նախագահ Սևակ Խաչատրյանը, ՀՅԴ Հայաստանի Գերագույն մարմնի անդամ, ԱԺ «Հայաստան» խմբակցության պատգամավոր Քրիստինե Վարդանյանը, ՀՅԴ անդամ, ԱԺ «Հայաստան» խմբակցության պատգամավոր Արթուր Խաչատրյանը, ԱԺ «Հայաստան» խմբակցության պատգամավոր Աննա Գրիգորյանը, ՀՀ երկրորդ նախագահ Ռոբերտ Քոչարյանը:

Իշխան Սաղաթելյանը իր ելույթում հայտարարեց, որ առաջիկա խորհրդարանական ընտրություններին մասնակցելու են միասնաբար` «Հայաստան» դաշինքով, որին միացել են «Առաջ» կուսակցությունը եւ բազմաթիվ հասարակական կազմակերպություններ:

Իշխան Սաղաթելյանի ելույթը ընդմիջվեց տեսաշարով, որում ներկայացվեց «Հայաստան» դաշինքի անցած քաղաքական պայքարի ճանապարհը:

Քրիստինե Վարդանյանը խոսեց երիտասարդության հետ կապված Դաշինքի ծրագրերի մասին՝ նշելով, որ այդ ծրագրերում առաջնային տեղ է գրավում բարձրագույն կրթությունը հանրապետությունում անվճար դարձնելը:

Արթուր Խաչատրյանը ներկայացրեց «Հայաստան» դաշինքի տնտեսական քաղաքականության հիմնական 12 ուղղությունները։

«Հայաստան» դաշինքի վարչապետի թեկնածուն ՀՀ երկրորդ նախագահ Ռոբերտ Քոչարյանն է. միջոցառման ժամանակ հայտարարեց ԱԺ «Հայաստան» խմբակցության պատգամավոր Աննա Գրիգորյանը։

Մենք վճռական ենք, մեր նպատակը հաղթանակն է. իր ելույթում ասաց Հայաստանի վարչապետի թեկնածու և Հայաստանի երկրորդ նախագահ Ռոբերտ Քոչարյանը։

«Չարիքը, որին մարմնավորում է այս իշխանությունը, կպարտվի։ Ես նրանց դեմ պայքարի մեջ եմ մտել նրանց իշխանության գալու առաջին իսկ օրերից և չեմ հանգստանա, մինչև նրանք չհեռացվեն։ Ես նաև սրանով եմ տարբերվում վարչապետի մյուս թեկնածուներից։ Բայց սա բավարար չէ։ Պետք է պատասխանատվության ենթարկվեն նրանք, ովքեր պատասխանատու են մեր հազարավոր հերոսների մահվան համար, ովքեր հանձնեցին Արցախը և այսօր ստիպում են ժողովրդին մոռանալ իր հերոսական պատմությունը»,- հայտարարեց Ռոբերտ Քոչարյանը։

Նշենք, որ 2026 թվականի հունիսի 7-ի ընտրություններին «Հայաստան» դաշինքը գնալու է «Միասին կարող ենք» կարգախոսով։

Մանրամասները՝ տեսանյութում

https://youtu.be/TDDCj_vPWck