Մարտի 23-ին Երկիր մեդիա հեռուստաընկերության «Երկրի հարցը» հաղորդաշարի հյուրն էր ՀՅԴ Հայ Դատի գրասենյակի պատասխանատու Կիրո Մանոյանը:

Անդրադարձ է կատարվել արտերկրում Հայ Դատի գրասենյակների գործունեության հիմնական ուղղություններին և առաջնահերթություններին:

Կիրո Մանոյանը նշել է, որ այս իրավիճակում էլ կազմակերպական կառույցը տարբեր երկրների խորհրդարաններում և միջազգային կառույցներում շարունակում է աշխատանքներ տանել երկու հիմնական ուղղություններով՝ արցախցիների իրավունքների պաշտպանության և Հայաստանի Հանրապետության միջազգային դիրքերի ամրապնդման:

Կիրո Մանոյանն անդրադարձել է նաև Հայաստանի և Ադրբեջանի միջև այսպես կոչված խաղաղության համաձայնագրին, որն ըստ նրա՝ նախաստորագրվել է Հայաստանի վրա ճնշումների և սպառնալիքների առկայությամբ, ինչը միջազգային իրավունքի տեսանկյունից առոչինչ է դարձնում այդ փաստաթուղթը: «Մենք մեր գործընկերներին նաև այս մասին ենք ասում, բացատրում ողջ ճշմարտությունը Արցախի խնդրի և այդ խնդիրը լուծված չլինելու մասին, ինչը, իմ կարծիքով, ընկալվում է նրանց կողմից: Այդ մասին են վկայում այն հայանպաստ բանաձևերը, որ այսօր կան թե Բելգիայի կոալիցիոն կառավարության հուշագրում և թե ԱՄՆ կոնգրեսում»,- նշել է Կիրո Մանոյանը:

Պատասխանելով հարցին, թե հնարավո՞ր է, արդյոք որ Արցախի հայաթափումից հետո հարցը կրկին դառնա միջազգային հարթակներում քննարկման առարկա, Կիրո Մանոյանը պատասխանել է, որ դա տեղի չի ունենա, քանի դեռ մենք՝ Հայաստանի Հանրապետությունը կխուսափի բարձրացնել արցախցիների վերադարձի իրավունքի, գերիների ազատ արձակման հարցերը, քանի դեռ կվախենա նույնիսկ Արցախ բառն արտասանել: «Մենք չխոսենք այս հարցերի մասին՝ մեր փոխարեն ոչ ոք չի խոսի»,- ասել է Կիրո Մանոյանը:

Մանրամասները՝ տեսանյութում