Այս իշխանությունը հերթական անգամ փորձ է անում իր աթոռը պահելու համար մանևրել, երբ պետք է դառնում են արևմտամետ, երբ պետք է՝ խիստ ռուսամետ. այսօր՝ ապրիլի 16-ին, ԱԺ -ում լրագրողների հետ ճեպազրույցում ասաց ՀՅԴ Բյուրոյի ներկայացուցիչ, ԱԺ «Հայաստան» խմբակցության պատգամավոր Արմեն Ռուստամյանը:

Ըստ նրա՝ իշխանությունները, երբ իրենց ձեռնտու է, դառնում են արևմտամետ, իսկ երբ պետք է՝ ռուսամետ։ Ռուստամյանը հավելել է, որ իշխող ուժի նպատակն է ցույց տալ, թե իրենք ընդունելի են բոլորի համար։ «Բայց անցած ճանապարհ կա, կատարված գործողություններ, քայլեր, որոնք ցույց են տալիս, որ իրենց հայտարարություններն անհամատեղելի են իրենց գործերի հետ։ Իրենք այնքան են հեռացրել հարաբերությունների վեկտորները Ռուսաստանից դեպի Արևմուտք, որ դժվար են կարողանալու տեղավորվել 2 կողմերի համար ֆավորիտը համարվելու միտումից», – ընդգծել է Արմեն Ռուստանյանը:

Նա կոչ արեց վարել Ռուսաստանի և Արևմուտքի հետ հարաբերությունները համատեղելու քաղաքականություն, այլ ոչ թե հետևել «կամ/կամ» սկզբունքին, ինչն էլ ներկայումս անում են իշխանությունները։ ««Եթե Ռուսաստանի հետ հարաբերությունները չեն վատթարացել, ապա ինչո՞ւ Ռուսաստանի նախագահը տեսախցիկի առջև հայտարարեց ՌԴ-ի հետ հարաբերությունների վատթարացման դեպքում Հայաստանի համար սպասվող հետևանքների մասին։ Իշխանությունները բոլոր հարթակներում խոսում են ընդդիմության մասին՝ որպես Կրեմլի ագենտների, այդ պատճառով եվրոպական կառույցները աչք են փակում մարդու իրավունքների խախտումների վրա, քանի որ կարծում են, թե դա տեղի է ունենում իբր Կրեմլի ագենտների նկատմամբ։ Նույնը տեղի ունեցավ նաև եկեղեցու պարագայում», – եզրափակել է Ռուստամյանը։

Անդրադառնալով առաջիկա ընտրություններին Արմեն Ռուստամյանն ասաց՝ եթե այս իշխանություններն առաջիկա ընտրություններում հաջողեն, ուրեմն կունենանք ոչ թե խորհրդարանական ընտրություններում ձևավորված Ազգային ժողով, այլ՝ Միլլի մեջլիս։

«Դրանից հետո ընդդիմադիրները կմտածեն մտնե՞լ Միլլի մեջլիս, թե՞ ոչ»,-ասաց նա։

Խոսելով ընդդիմության անելիքների մասին, Արմեն Ռուստամյանն ասաց. «Ընդդիմությունը, անկախ ամեն ինչից, մի պարզ տրամաբանություն պետք է ընդունի. այսօր ոչ ոք չի կարող առանձնաբար հաջողել այս ընտրություններում, 50%-ից ավել ոչ ոք չունի, բայց միասնական ընդդիմությունը կարող է այո ունենալ ավելին, քան այսօրվա գործող իշխանությունն է: Եվ սա նշանակում է, որ պետք է առաջին հերթին հասնել մասնակցության տոկոսի բարձր մակարդակի: Դա է տեղի ունենում բոլոր տեղերում: Տեսնում եք, որտեղ որ իշխանությունը պարտվում է, պարտվում է, երբ որ մասնակցությունը բարձր տոկոս է գրանցել: Հունգարիայի օրինակը ձեզ օրինակ։ Այսինքն այստեղ, օրինակ, եթե 60% մասնակցություն ունենա, այս իշխանությունները վերընտրվելու տարբերակ չունեն: Բացառված է: Խոսքն ընդդիմության մեծ շանս ունենալու մասին է։ Ընդդիմությունը պետք է աշխատի ընդհանուր ընդդիմության ձայները մեծացնելու ուղղությամբ։ Թե այդտեղ ով ինչ տոկոս կունենա, ինձ այդքան հետաքրքիր չէ։ Կարեւորը, որ բոլորը միասին ունենան ավելի շատ մանդատ, քան այսօրվա գործող իշխանությունը։ Դա հնարավոր է անել ջանքերը համադրելով:

Այսօր ընտրական գործընթացներն ամբողջությամբ վերահսկելու հարց գոյություն ունի։ 2000-ից ավելի տեղամաս կա եւ այդ տեղամասերում պետք է ամբողջական վերահսկողություն իրականացնել։ Ոչ մի քաղաքական ուժ դա ամբողջական ծածկելու հնարավորություն չունի։ Իսկ վերահսկել անհրաժեշտ է, որովհետեւ այս իշխանություններն իրենց իշխանությունը պահելու համար ամեն ինչի գնալու են՝ կեղծիքներ էլ կանեն, ամեն ինչ էլ կանեն։ Ես չեմ կասկածում, որովհետեւ իրենց համար կյանքի-մահու հարց է։ Այսօր փաթեթներով գործեր են սպասվում այս իշխանություններին դատարաններում այս հարցերը հետապնդելու համար։ Իրենք շատ լավ գիտեն դրա մասին»։

Մանրամասն՝ տեսանյութում