Արցախի հարցը շարունակվում է համահայկական ազգային ուժերով միջազգային օրակարգում պահվել։ Ապրիլի 11-12-ը Փարիզում կայացած Սփյուռքի ազգային զորաշարժի խորհրդաժողովը կարևոր մեկնակետ էր այս առումով։

Աշխարհի տարբեր երկրներից ժամանած 150 պատվիրակների թվում էր նաև Արցախի ԱԺ նախագահի գլխավորած պատվիրակությունը։ ԱՀ իշխանություններն, Արցախի հայաթափումից ի վեր, առաջին անգամ հնարավորություն ունեցան ներկայացնելու Արցախի ժողովրդի հիմնարար իրավունքների պաշտպանության հարցերը։ Խորհրդաժողովին Ամենայն Հայոց Գարեգին Բ Կաթողիկոսի և Մեծի Տանն Կիլիկիո Կաթողիկոս Արամ Վեհափառի ուղերձներում կարևորվեց Սփյուռքի համախմբումը ազգային օրակարգերի շուրջ, Արցախի ժողովրդի իրավունքների պաշտպանության շուրջ, վերադարձի իրավունքի, հայ գերիների ազատ արձակման ուղղությամբ մեկտեղելով ջանքերը։

Խորհրդաժողովը կարևոր արձանագրումներ արեց Արցախի ժողովրդի իրավունքների պայքարի շուրջ։ Վերահաստատեց համահայկական ուժերի համախմբումը միջազգային օրակարգում պահելու Արցախի հարցն ու տեղահանված ժողովրդի վերադարձի իրավունքի իրացման պայքարը, Արցախի վտանգված մաշկութային և հոգևոր արժեքների պաշտպանության անհրաժեշտությունը։

Կարևորեց գերիների անհապաղ ազատ արձակման հարցի հետապնդումը։ Արցախի ժողովրդի իրավունքների պաշտպանության եւ հավաքական վերադարձի իրավունքի միջազգայնացման ուղղված աշխատանքները։
Արցախի պետական կառույցների գործունեության լիարժեք աջակցությունը։
Արցախի Հանրապետությունից բռնի տեղահանված հայրենակիցների՝ ՀՀ-ում քաղաքացիական իրավունքների պաշտպանության և ընկերային-տնտեսական խնդիրների լուծման ուղղությամբ աշխատանքները։

Արցախի պատվիրակությունն առիթ ունեցավ Եվրոպական խորհրդարանի պատգամավորներին ներկայացնելու Արցախի ժողովրդի իրավունքների հարցերն ու Բաքվում պահվող հայ գերիների ազատ արձակման ուղղությամբ միջազգային ճնշումներ գործադրելու անհրաժեշտությունը։
Ներկա հանգրվանում, երբ ՀՀ իշխանությունները հրաժարվում են արցախցիների իրավունքների համար պայքարից, շատ կարևոր է համակարգված և շարունակական աշխատանքը Սփյուռքի ներուժով և ազգային կառույցների ջանքերով Արցախի իշխանություններին հնարավորություն տալու ներկայացնելու միջազգային տարբեր հարթակներում Արցախի ժողովրդի իրավունքների պաշտպանության հարցերը։

Հայ Դատի աշխարհասփյուռ կառույցներն իրենց անխոնջ աշխատանքով շարունակում են բարձրաձայնել արցախցիների ձայնը, սակայն ՀՀ իշխանությունների մերժողական քաղաքականությունը գլխավոր արգելքն է հանդիսանում այս կարևոր ջանքերի։ Ուստի, հունիսի 7-ը կարևոր է Արցախի ու արցախցիների վերադարձի իրավունքի պայքարի համար։

«Ապառաժ»-ի խմբագրական

20 ապրիլ, 2026թ.