ՀՅԴ Կանադայի Հայ դատի պատասխանատու Սևակ Բելյանը Սևակ Բելյանն Alpha News-ի հետ զրույցում անդրադարձել է Հայաստանի իշխանությունների կողմից Հայոց Ցեղասպանության հարցում որդեգրված քաղաքականության և դրա հնարավոր ազդեցությանն ինչպես Սփյուռքի, այնպես էլ միջազգային հանրության դիրքորոշումների վրա։

Նրա խոսքով՝ անկախությունից ի վեր ՀՀ-ն այս հարցը դիտարկել է որպես առաջնահերթություն։ «Դա ամրագրված է եղել նաև արտաքին քաղաքականության հիմնական ուղղություններում։ Եթե այդ քաղաքական օրակարգում փոփոխություններ տեղի ունենան, դա կարող է ազդել նաև տարբեր երկրների մոտեցումների վրա։ Թեև առայժմ նման կտրուկ փոփոխություններ չեն արձանագրվել»,- նշել է Բելյանը։

Այդուհանդերձ, ըստ նրա, միջազգային շրջանակներում արդեն նկատվում են որոշ ակնարկներ և արձագանքներ։

«Հնչում են կարծիքներ՝ եթե Հայաստանը վերանայում է իր քաղաքական առաջնահերթությունները, ապա Սփյուռքն էլ գուցե պետք է նվազեցնի իր պահանջատիրության նշաձողը՝ շարունակելով հիշել և ոգեկոչել, բայց այլ մակարդակով»,- ասել է Բելյանը՝ հավելելով, որ նման մոտեցումները պաշտոնական չեն, սակայն արդեն շրջանառվում են։

Նա նաև ընդգծել է, որ այդպիսի զարգացումները կարող են վտանգավոր հետևանքներ ունենալ, քանի որ տարբեր երկրներ կարող են իրենց դիրքորոշումները վերանայել՝ հղում անելով Հայաստանի ներկա իշխանությունների վարքագծին և հայտարարություններին։