Ապրիլի 30-ին Հրապարակ TV-ի «Հինգշաբթի» հաղորդաշարի հյուրն էր ՀՅԴ անդամ, ՀՀ Ազգային ժողովի «Հայաստան» խմբակցության պատգամավոր Արթուր Խաչատրյանը:

Անդրադարձ է կատարվել Ադրբեջանի փոխվարչապետ Շահին Մուստաֆաևի չհայտարարված այցին Հայաստան, այցի ընթացքում ՀՀ իշխանությունների պահվածքին, Հայաստանի և Ադրբեջանի միջև սահմանազատման և սահմանագծման գործընթացի հնարավոր՝ մեզ համար ոչ բարենպաստ զարգացումներին: Արթուր Խաչատրյանի կարծիքով՝ Մուստաֆաևի այցը պետք է դիտարկել նաև Հայաստանում տիրող նախընտրական տրամադրությունների և տրամաբանության շրջանակներում: Ըստ պատգամավորի՝ Մուստաֆաևի գլխավորած պատվիրակության հանդիպումը մի խումբ հայ գործարարների հետ և վերջիններիս տրված խոստումները ադրբեջանական շուկաների ու տարանցիկ ճանապարհների մասին, ըստ էության, ոչ այլ ինչ է, եթե ոչ առաջիկա ընտրություններում ՀՀ իշխանություններին և նրանց վարած արտաքին քաղաքականությանը սատարելու կոչ:

Խոսելով այցի ընթացքում կողմերի միջև կայացած հապճեպ համաձայնությունների մասին՝ Արթուր Խաչատրյանը մտահոգություն է հայտնել, որ նրանց ստորագրած փաստաթղթից հստակ չի երևում, թե սահմանի որ հատվածից և ինչ քարտեզներով են շարունակելու սահմանազատումն և սահմանագծումը: «Եթե ավելի վաղ արդեն իսկ հայտարարվել էր ԽՍՀՄ զինված ուժերի գլխավոր շտաբի քարտեզներով առաջնորդվելու մասին, ապա ինչո՞ւ է այդ փաստաթղթում հղում կատարվում նոր կազմվող ինչ-որ քարտեզների»,- ասել է նա:

Առաջիկա ընտրությունների համատեքստում անդրադարձ է կատարվել նաև ներքաղաքական իրավիճակին: Ըստ Արթուր Խաչատրյանի՝ ՀՀ իշխանությունները պահպանում են իրենց տերերին դուր գալու և նրանց վստահությունը շահելու գործելաոճը՝ չմոռանալով անընդհատ խոսել խաղաղության մասին, մինչդեռ այն ինչ ունենք այսօր ոչ միայն խաղաղություն չէ, այլև վտանգավոր վիճակ՝ երկիրը նոր մարտահրավերների առջև կանգնեցնելու առումով: «Մենք դա թույլ չենք տալու, մենք գալիս ենք ժողովրդի քվեով արժանապատիվ, հավասարը հավասարի խաղաղություն հաստատելու»,- ասել է Արթուր Խաչատրյանը:

Մանրամասները՝ տեսանյութում