Նիկոլ Փաշինյանին օժանդակող օլիգարխներն ու գործարարներն օգնում են նրան կատարել Ալիևին տված խոստումները։ Դրա մասին լրագրողների հետ զրույցում հայտարարել է ՀՅԴ Հայաստամի ԳՄ ներկայացուցիչ, «Հայաստան» դաշինքի պատգամավոր Իշխան Սաղաթելյանը՝ մայրաքաղաքի Աջափնյակ վարչական շրջանի բնակիչների հետ դաշինքի ներկայացուցիչների հանդիպման մեկնարկից առաջ։

Պատգամավորը զգուշացրել է խոշոր գործարարներին Փաշինյանին օժանդակելուց՝ հայտարարելով, որ նման տեմպերով նրանց հարստությունը կարող է բաժին հասնել թուրքերին։ «Լուծվում է պետականության հարցը, իսկ նրանք ընդամենը գործիք են, որպեսզի Փաշինյանը կատարի Ալիևին տված իր խոստումները։ Փաշինյանի գործունեության արդյունքում հակառակորդը Ջերմուկի մոտ է։ Ահա ձեզ հանցագործը և նրա մեղսակիցները»,- փաստել է պատգամավորը։

Մեկնաբանելով Լեռնային Ղարաբաղի խորհրդարանի նախագահ, գերության մեջ գտնվող Դավիթ Իշխանյանի վերաբերյալ հայտարարությունները՝ Սաղաթելյանն ասել է, որ գերիները Բաքվում են Փաշինյանի ցանկությամբ, որն Ալիևի հետ միասին ամեն ինչ արել է, որպեսզի նրանք Հայաստանում չլինեն և չխոսեն Արցախի մասին։

Մանրամասները՝ տեսանյութում