Այսօր՝ հունիսի 9-ին ՀՅԴ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը ճեպազրույց է տվել՝ անդրադառնալով ընտրակեղծիքներին և ընդդիմության հետագա քայլերին։

«Հայաստան» դաշինքը հունիսի 7-ի խորհրդարանական ընտրությունների՝ մի շարք տեղամասերի քվեարկության արդյունքները բողոքարկել է, տեղի է ունենալու վերահաշվարկ. ասաց Իշխան Սաղաթելյանը:

«Ակնհայտ է, որ կան տեղամասերում ստորագրված արձանագրությունների և ԿԸՀ-ի կայքում տեղադրված տվյալների անհամապատասխանություն»,- նշեց Իշխան Սաղաթելյանը։

«Մենք պատրաստվում ենք դիմել Սահմանադրական դատարան՝ վիճարկելու ընտրությունների արդյունքները: Ակնհայտ է, որ ընտրությունները տեղի են ունեցել ճնշումների, ոչ արդար, ոչ ազատ պայմաններում, դրա համար կան բազմաթիվ փաստեր, փաթեթը պատրաստվում է» :

Անդրադառնալով մանդատները վերցնել-չվերցնելու հարցի քննարկումներին՝ Սաղաթելյանն ասաց. «Այս հարցերի պատասխանն ունենալուց հետո համապատասխան խորհրդակցություններ անցկացնելուց հետո ընդդիմադիր գործընկեր քաղաքական ուժերի հետ, որովհետեւ այդ որոշումը, պետք է լինի միասնական, մեր դիրքորոշումը վերջնական կհայտնենք: Մեր ցանկացած որոշում բխելու է ընդհանուր պայքարի տրամաբանությունից»:

Նա շեշտեց, որ այս գործընթացում կարեւորում են նաեւ այն հանգամանքը, որ հասկանան՝ ԲՀԿ-ի շեմը հաղթահարելու հարցը, որովհետեւ իրենց կարծիքով՝ այդտեղ ակնհայտ ապօրինություն է տեղի ունեցել, երրորդ ընդդիմադիր ուժի մուտքը ԱԺ սահմանափակելու առումով:

Իշխան Սաղաթելյանը դիմեց քաղաքացիներին՝ հորդորելով չհուսահատվել և չընկճվել։

«Իրականում, ծանր մթնոլորտ է, թրքահպատակ իշխանությունըը, որը երկիրը տանելու է մի նոր փորձության, վարչական խայտառակ մեթոդներով փորձում է վերարտադրությունը ապահովել։ Սա իհարկե ծանր հարված է այն մարդկանց համար, որոնք դուրս են եղել պայքարի։

Այս պահին կարող եմ ասել, որ մենք աննահանջ շարունակելու ենք մեր պայքարը, որովհետև հաշտվել, համակերպվել, չի լինելու»,–ասաց նա։

Մանրամասները տեսանյութում՝