Այսօր՝ հունիսի 26-ին, Սահմանադրական դատարանը քննում էր հունիսի 7-ի խորհրդարանական ընտրություններն անվավեր ճանաչելու վերաբերյալ 7 քաղաքական ուժերի դիմումները։ Այդ կապակցությամբ ՍԴ շենքի դիմաց տեղի ունեցավ «Հայաստան» դաշինքի, «Ուժեղ Հայաստան»-ի ու ԲՀԿ-ի բողոքի ցույցը՝ ի պաշտպանություն քաղաքացիների քվեների:

Քաղաքական ուժերը պահանջում են անվավեր ճանաչել ընտրությունների արդյունքները նշանակել նոր ընտրություններ կամ երեք տեղամասերում անցկացնել վերաքվեարկություն:

«Առաջիկա օրերին կպարզվի՝ սահմանադրական բարձր դատարանը կմնա օրենքի շրջանակում, իր դերում, թե չէ»,- լրագրողների հետ զրույցում ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը։ Նա նաև նշեց. «Այնպես չէ, որ դատարանը արդեն ունի հեղինակություն, շարժվել է մինչև հիմա օրենքի շրջանակներում, բայց ամեն դեպքում դիմում կա, հնարավորություն տրված է, տեսնենք ինչ արդյունք կլինի»։

Իշխան Սաղաթելյանն անդրադարձավ նաև առաջիկա քայլերին. «Սահմանադրական դատարանի որոշումից հետո մենք կներկայացնենք մեր դիրքորոշումը՝ վերցնում ենք մանդատները, չենք վերցնում, եթե վերցնում ենք ինչ օրակարգով, եթե գնում ենք խորհրդարան, առնվազն ինչ ճանապարհային քարտեզ ենք պատկերացնում և գնալու դեպքում ինչ օրակարգով, ինչ քայլերով, ինչ ռեժիմով, ինչ ենք անելու, չգնալու դեպքում ինչ ենք անելու»։

«ԿԸՀ-ի կողմից երեք ընտրատեղամասերի ընտրությունների արդյունքներն անվավեր ճանաչելու գործընթացն ունի բազմաթիվ հակաօրինական և հակասահմանադրական դրսևորումներ, և եթե Սահմանադրական դատարանը չվերականգնի օրինականությունը, դա վտանգավորագույն նախադեպ կստեղծի երկրի ապագայի համար»,- հայտարարեց «Բարգավաճ Հայաստան» կուսակցության մամուլի քարտուղար Իվետա Տոնոյանը։

«Ինչ էլ որոշի Սահմանադրական դատարանը հայ ժողովրդի պատմության մեջ 2026 թվականի խորհրդարանական ընտրությունները մնալու են ոչ լեգիտիմ, մնալու են կեղծված»,- իր խոսքում ասաց ՀՅԴ Հայաստանի ԳՄ անդամ, «Հայաստան» դաշինքնի պատգամավոր Գեղամ Մանուկյանը։

Նրա խոսքով՝ գործող իշխանությունների ընտրական մեքենայությունները չեն ավարտվել քվեարկության օրը, այլ շարունակվում են մինչ օրս։

«Այսօր այս շենքում չի վճռվում միայն այս ընտրությունների հարցը, չի վճռվում այն հարցը, թե որ քաղաքական ուժը քանի մանդատ կստանա, խորհրդարանում քանի ձայն կունենա Նիկոլ Փաշինյանը և ինչ օրենքներ կկարողանա ընդունել։ Այսօր այս շենքում վճռվում է Հայաստանի ճակատագիրը, հայերիս ճակատագիրը»,- հայտարարեց ՀՅԴ անդամ, «Հայաստան» խմբակցության պատգամավոր Արթուր Խաչատրյանը։

Դիմելով ներկաներին՝ Արթուր Խաչատրյանը նաև հարց հնչեցրեց. «Մենք ի՞նչ երկիր ենք ուզում ունենանլ, երկի՞ր, որտեղ վերջիվերջո մենք կկարողանանք մեր ազգային նպատակները իրականացնել և ունենալ ազգային պետություն, թե՞ երկիր, որի սահմանադրությունը գրվելու է Բաքվում»:

Իր խոսքում «Ուժեղ Հայաստան» կուսակցության մամուլի խոսնակ Մարիաննա Ղահրամանյանն էլ մասնավորապես նշեց, որ Սահմանադրական դատարանը պարտավոր է կանգնել ճշմարտության կողքին և չեղարկել կեղծված ընտրությունները:

Նշենք, որ ՍԴ-ն առաջիկա օրերին կքննի 7 ընդդիմադիր ուժերի դիմում-բողոքները, իսկ վերջնական վճիռը կհայտնի հուլիսի 4-ին:

Տեսանյութն այստեղ