«Սա ուղիղ քաղաքական վրեժխնդրություն է, քաղաքական հետապնդում է, մարդկանց մանդատները գողացան՝ 60 հազար ձայն, հիմա էլ փորձում են այս ճանապարհով հետապնդել, սահմանափակել քաղաքական ուժի գործունեությունը»,-լրագրողների հետ զրույցում ասաց ՀՅԴ ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը՝ Ավան և Նոր Նորք վարչական շրջանների ընդհանուր իրավասության դատարանի մոտ, որտեղ ընթանում էր «Բարգավաճ Հայաստան» կուսակցության առաջնորդ Գագիկ Ծառուկյանին կալանավորելու միջնորդության քննությունը։

Ըստ Իշխան Սաղաթելյանի՝ Փաշինյանը ձգտում է այս ճաապարհով երկրում հաստատել մեկ անձի իշխանություն՝ լավ գիտացելով, որ ինքը զուրկ է լեգիտիմությունից. «Նման կերպ՝ ընդդիմադիր քաղաքական ուժերի, գործիչների հետապնդմամբ փորձում է ճանապարհ հարթել դիմադրության օջախները ոչնչացնելու, դրսի գործընկերներին տված խոստումներն իրականացնելու համար։ Այս իշխանության դեմ, որը զուրկ է լեգիտիմությունից, չունի սրբություն, կարմիր գիծ, իր իշխանությունը պահելու համար պատրաստ է ամեն ինչի, պետք է ինստիտուցիոնալ, համակարգված դիմադրություն, բոլոր քաղաքական ուժերը, ազգային գործիչները մեր երկրի համար մտահոգ հասարակական, քաղաքական, մտավորական շրջանակները մեկտեղեն իրենց ջանքերը, կազմակերպեն դիմադրություն ու հասնենք փոփոխության»։

Իշխան Սաղաթելյանը նաև ընդգծեց, որ մանդատ վերցնելը չի նշանակում, որ ընդդիմությունը, առնվազն խորհրդարանական, հրաժարավում է փողոցային պայքարից. «Եվ հանրահավաքներ են լինելու, և փողոցային պայքար, խնդիրն է՝ երբ, ինչ կառուցվածքով, ինչ ուժերով։ Այդ քննարկումները շարունակվում են»։

Նրա խոսքով՝ Հայաստանում ազգային մտածողություն ունեցող մարդը հետապնդվում է․ «ով չի սպասարկում թուրք-ադրբեջանական օրակարգ, հետապնդվելու է, այն գործարարը, ով հաշտ չի լինելու այս թրքացման հետ, կապ չունի՝ ինքը զբաղվում է քաղաքականությամբ, թե՝ ոչ, ինչ-որ պահի, եթե սրանք մնան իշխանության, հայտնվելու է այս ամենի մեջ»,-ասաց Իշխան Սաղաթելյանը։