Ավելի քան ակնհայտ է, որ Գագիկ Ծառուկյանի նկատմամբ, ինչպես նաև բազմաթիվ քաղաքական ընդդիմախոսների պարագայում, իրականացվում է ոչ թե իրավական գործընթաց, այլ տեղի է ունենում կամայականություն։ Այս մասին լրագրողների հետ ՊԵԿ շենքի մոտ (որտեղ ընթանում է «Բարգավաճ Հայաստան» կուսակցության ղեկավար Գագիկ Ծառուկյանի հարցաքննությունը) տեղի ունեցած զրույցում հայտնել է ՀՅԴ Բյուրոյի անդամ, ԱԺ «Հայաստան» խմբակցության Լիլիթ Գալստյանը։

Վրեժ, անբարոյականություն, կարմիր գծերի խախտում․ այսպես է բնութագրել քաղաքական գործիչը իրավիճակը՝ հավելելով, որ իշխանությունները փորձում են ծնկի բերել ոչ թե Գագիկ Ծառուկյանին, այլ բոլորիս։ Գալստյանը նկատել է, որ իրավունքների ոտնահարումը, վախի մթնոլորտի ստեղծումը ոչ մի ընդհանուր բան չունեն իրավական պետության և ժողովրդավարության հետ։

Ողջ իրավական համակարգը դարձել է Նիկոլ Փաշինյանի ձեռքին գործիք, Հայաստանում վաղուց խախտված է սահմանադրական կարգը, Սահմանադրությունը չի գործում, տեղի է ունենում մեկ անձի կամայականություն, հավելել է Գալստյանը։ Նրա խոսքով՝ այս պայմաններում իրավունքի մասին խոսելու փորձերը դոնքիշոտություն են։

«Մենք երբեք չենք մերժել փողոցային պայքարը, սակայն մեծ նշանակություն ենք տվել միասնական ընդդիմադիր ճակատի ստեղծմանը։ Հայաստանի պետականության պահպանման համար այլ ելք չկա դրա ստեղծումից բացի»,- նշել է Գալստյանը։

Մանրամասները՝ տեսանյութում