ՀՅԴ Արցախի ԿԿ ներկայացուցիչ Արա Պուլուզյանը «Ապառաժ»-ի հետ զրույցում, արձագանքելով Նիկոլ Փաշինյանի՝ օգոստոսի 8-ին հնչեցրած այն հայտարարությանը, որ «խաղաղությունն անշրջելի դարձնելու համար անհրաժեշտություն է «Լեռնային Ղարաբաղի հայերի վերադարձի» իրավունքի մասին խոսույթը չշարունակելը», նշեց․

«Մի քանի օր առաջ լսեցինք Դավիթ Իշխանյանի ձայնը Բաքվի բանտից։ Նա մեզ արժանապատվության զգացում փոխանցեց, իսկ երեկ ականատեսը եղանք այս իշխանությունների պարագլխի քծնանքին ու շողոքորթությանը Ալիևին։ Դավիթ Իշխանյանը և հայ գերիները, որոնք այսօր գտնվում են Արցախի ժողովրդի դեմ իրականացված ցեղասպանության հեղինակների և կատարողների դատարանների առաջ, իրենց շատ ավելի արժանապատիվ են պահում և, փաստորեն, ավելի են պաշտպանում հայ ժողովրդի իրավունքներն ու պատիվը, քան Հայաստանի այսօրվա իշխանությունները։

Արժանապատվությունը արդարության համար պայքարին նվիրվելու պատրաստակամությունն է, իրավունքը չզիջելն է։ Մարդկության պատմության զարգացման և ազգերի պատմության մեջ նրանք են արժանի տեղ ունեցել, հերոսացել, ներշնչման աղբյուր դարձել, ովքեր պայքարել են հանուն արդարության, հանուն իրավունքի։ Արժանապատիվ մարդու համար հոգ չէ՝ այսօր զնդանում է, թե ազատության մեջ։ Կարևորը հանուն վեհ գաղափարի սկզբունքային և քաջարի կեցվածքի առկայությունն է։

Իսկ միայն այսօրեական որկրամոլության և իշխանական աթոռների համար ստորաքարշները վաղ թե ուշ պատմության աղբարկղում են հայտնվելու։ Պատմության անիվը նրանց դուրս է շպրտելու, և նրանք ունենալու են ֆրանգյուլների ու վասակների ճակատագիրը։ Դա անխուսափելի է։

Վստահ եմ՝ հայ ժողովուրդը արհամարհելու և նվաստության աթոռին է գամելու նաև մերօրյա ֆրանգյուլներին։

Արցախի ժողովրդի իրավունքները սակարկության առարկա չեն։ Իրավունքը փոխզիջման առարկա չէ։ Իրավունքի հիմքն արդարությունն է, իսկ արդարությունը համամարդկային արժեք է»։