Այս իշխանությունը սպառնալիք է հայկական պետականության համար, հետևաբար, նոր գումարման խորհրդարանում, այս փուլում, այս իշխանության գոյության պայմաններում, մեր երկրի առջև կանգնած մարտահրավերները ոչ միայն չեն վերացել, այլ դրանք օրեցօր ավելանում են: Հետևաբար, իշխանափոխության հարցը շարունակում է մնալ օրակարգում։ Այս մասին ԱԺ-ում լրագրողների հետ զրույցում ասել է ՀՅԴ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը։

«Խորհրդարանում այսօր կա նաև մեկ խոշոր խմբակցություն, կան արտախորհրդարանական ուժեր, կան շահագրգիռ ուժեր, իշխանափոխության հարցում։ Այս բոլորի հետ պետք է քննարկենք, համախմբում ստեղծենք, ճանապարհային քարտեզ մշակենք և փորձենք հասնել մեր նպատակին։ Այդ քննարկումները այս փուլում կան, մենք ունենք մեր պատկերացումները, բայց դա հրապարակայնացնելուց առաջ ճիշտ կլինի այդ օրակարգի շուրջ լինի համաձայնություն։ Ես կարծում եմ դրա գլխավոր բախման, այսպես ասած, իվենտները լինելու են Սահմանադրության փոփոխության հարցը։ Առաջիկայում այս իշխանությունների կողմից նախապատրաստվող հանձնումների հարցը՝ անկլավների տեսքով կամ այլ տեսքով։ Այսինքն, ծանր խնդիրներ կան մեր առջև կանգնած, և այս իշխանությունը հիմիկվանից ժողովրդին և դաշտը պատրաստում է այդ զիջումներ իրականացնելու համար։

Մենք պետք է ստեղծենք դրան դիմագրավող համակարգեր, որ կարողանանք թույլ չտալ և հասնել իշխանափոխության»։

Անդրադառնալով TRIPP-ի շրջանակում էլեկտրահաղորդման ենթակառուցվածքների միջոցով ՀՀ-ում հնարավոր էներգառեսուրսների սղության դեպքում պահանջարկը բավարարելուն՝ Սաղաթելյանն ասաց, որ չի հավատում, որ Ադրբեջանը կամ Թուրքիան կարող են դառնալ ՀՀ-ի համար այլընտրանքային աղբյուր։ «Ո՞նց կարելի է ենթադրել, որ թշնամի պետությունները, որոնք վերջին 100 տարվա մեջ 2 անգամ մեր սեփական հայրենիքում ցեղասպանություն են իրականացրել մեր նկատմամբ, պետություններ, որոնք հայկական էթնոսի, հայ մարդու, հայ ինքնության հետ խնդիր ունեն, անընդհատ ուզում են ոչնչացնել, այդ պետությունները կարող են դառնալ բարեկամ, հրաժարվել իրենց աշխարհաքաղաքական ծրագրերից և դառնան մեզ այլընտրանքային մատակարարման աղբյուր։ Ես դրան չեմ հավատում»։

Դիտարկմանը, թե առևտրատնտեսական շարժը այդ մասին չէ արդյոք՝ նա ընդգծեց, որ դա հասարակությանը բթացնելու համար է։ «Նախընտրական շրջանում Ալիևը կիսով չափ ՔՊ-ի նախընտրական շտաբի պետի պարտականություններն էր կատարում, բենզին, ցորեն էր ուղարկում։ ՔՊ-ի վերարտադրությունը ապահովելու, շարունակական զիջումներ իրականացնելու համար։ Հետևաբար, այս ընթացքում պետք է հասարակությանը բթացնեն, մոլորեցնեն և ցույց տան, թե ամեն ինչ վերջացած է՝ մենք այլևս եղբայրական ժողովուրդ ենք, որ տանեն մեզ նոր զիջումների և կոտորածի։

Նման մատակարարումները, եթե դիտարկում ենք իբրև այլընտրանքային աղբյուրներ, այո, հիմա մեզ համար ռիսկեր է պարունակում։ Հիմա մեզ կկտրեն մեր հիմնական մատակարարներից, կմնանք իրենց հույսին, հետո այդ «ծորակը» կփակեն։ Նիկոլ Փաշինյանի քաղաքականությունը հետևյալ է՝ թշնամանալ բարեկամ երկրների հետ և փորձ անել բարեկամանալ թշնամի երկրների հետ։ Արդյունքում, բարեկամների հետ թշնամանալու ենք, իսկ թշնամիների հետ չենք բարեկամանալու և երկիրը տանելու են նոր արկածախնդիրությունների»։

Մանրամասները՝ տեսանյութում