Այսօր՝ սեպտեմբերի 16-ին Ազգային ժողովում տեղի ունեցավ ՀՅԴ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանի ճեպազրույցը՝ քաղաքական օրակարգային հարցերի վերաբերյալ։

Անդրադառնալով ՀՀ տարածքից Գյումրիում տեղակայված ռուսական 102-րդ ռազմաբազայի դուրս բերելուն՝ Իշխան Սաղաթելյանն ասաց. «Ռազմաբազան որոշակի առաքելություն ունի, և այս աշխարհաքաղաքական պայմաններում Հայաստանն անպաշտպան թողնել թշնամիների երախում՝ արկածախնդրություն է երկրի համար։ Դա հանգեցնելու է անվտանգային նոր սպառնալիքների։ Չի՛ կարելի գնալ այդ արկածախնդրությանը, ինչպես նաև ԵԱՏՄ-ից դուրս գալուն»,- ընդգծեց Սաղաթելյանը։

Մեկնաբանելով իշխող խմբակցության ներկայացուցիչ Արման Եղոյանի հայտարարությունն այն մասին, թե ՀՅԴ-ն անհրաժեշտ է արմատախիլ անել՝ Սաղաթելյանը նշեց, որ իշխանությունները վաղուց են դա ցանկանում։ «Այս իշխանությունը թուրք-ադրբեջանական տանդեմի խամաճիկն է ու այդ պատճառով շատ հետևողական պայքար է սկսել ազգային գաղափսրախոսության և հենց ազգայինի նկատմամբ: Սա լոկ Դաշնակցության դեմ պայքար չէ իբրև կուսակցություն, սա պայքար է հայկականության, համահայկականության, ազգային նկարագրի ու գաղափարախոսության դեմ: Այն ինչ անում է ՔՊ-ն, Հայաստանի և հայ ժողովրդի նկատմամբ դենացիոնալիզացիայի ծրագիր է: Դաշնակցությունը՝ որպես համահայկական, ազգային քաղաքական ուժ, գլխավոր թիրախներից է, բայց ոչ միակը: Տեսնում ենք, թե ինչ է կատարվում տարբեր քաղաքական գործիչների, հատկապես Հայ առաքելական եկեղեցու նկատմամբ»,- ասաց Սաղաթելյանը:

Ըստ Իշխան Սաղաթելյանի՝ արմատախիլ պետք է արվի ՔՊ-ն ամբողջությամբ, քանի որ դժբախտություն, մահ, ողբերգություն բերած քաղաքական ուժ է:

Անդրադառնալով Առուշանյանի՝ «Քաղաքացիական պայմանագիր» կուսակցության հետ դաշինքով առաջադրվելու որոշմանը՝ Իշխան Սաղթելյանն ասաց, որ խիստ հիասթափված է և սկզբում չէր հավատում։ Առուշանյանի վարքագիծն անընդունելի է ու անհասկանալի՝ թե՛ քաղաքական, թե՛ այլ առումներով։

Սաղաթելյանը նշեց, որ ՏԻՄ ընտրություններին ՀՅԴ-ն մասնակցելու է մի շարք համայնքներում։ «Մեր մյուս ուժը՝ «Առաջ» կուսակցությունը, ևս մասնակցելու է ընտրություններին: Ամբողջ Հայաստանում խայտառակ բռնաճնշումներ են ընթանում ՏԻՄ ընտրւթյունների հետ կապված: Ուժային կառույցներ, ԱԱԾ, քննչական կոմիտե, ոստիկանություն, նույնիսկ հարկային մարմիններն ու մարզպետարանները ստեղծել են հանցավոր խումբ և հետապնդում են բոլոր այն քաղաքական ուժերին ու ավագանու անդամներին, որոնք պատրաստվում են մասնակցել առաջիկա ՏԻՄ ընտրություններին: Սա համատարած բնույթ է կրում: Բռնաճնշումների մի նոր խայտառակ մակարդակ է»,- ասաց Սաղաթելյանը:

Ճեպազրույցն ամբողջությամբ՝ տեսանյութում