Անցնող շաբաթավերջին, կազմակերպութեամբ ՀՅԴ «Կարմիր լեռ» կոմիտէի դաստիարակչական-քարոզչական յանձնախումբին, Այնճար հայաւանին մէջ տեղի ունեցան Մուսա լերան հերոսամարտի 111-ամեակի եւ Այնճարի հիմնադրութեան 87-ամեակի հիմնական հանդիսութիւնները եւ արարողութիւնները:

Ուրբաթ, 18 սեպտեմբեր 2026-ին, ԼՕԽ-ի «Աղթամար» մասնաճիւղին կազմակերպութեամբ տեղի ունեցաւ տոհմիկ երեկոյ, ՀՄԸՄ Այնճարի «Սարգիս եւ Ծովիկ Զէյթլեան» մարզամշակութային համալիրին մէջ, ներկայութեամբ հոծ բազմութեան: ԼՕԽ-ի «Աղթամար» մասնաճիւղի եւ ԼՕԽ-ի Շրջանային վարչութեան խօսքերը ուղղեցին յաջորդաբար Աշխէն Չափարեան եւ Սիւզի Նաշալեան: ՀՅԴ «Կարմիր լեռ» կոմիտէին խօսքը ուղղեց Շահան Փանոսեան: Խօսք առաւ նաեւ Այնճարի քաղաքապետ Սեդրակ Հաւաթեան: Տեղի ունեցաւ գեղարուեստական յայտագիր:

Շաբաթ, 19 սեպտեմբեր 2026-ին, երեկոյեան ժամը 8:30-էն սկսեալ, տեղի ունեցաւ Մուսա լերան հերոսամարտի 111-ամեակի եւ Այնճարի հիմնադրութեան 87-ամեակի պաշտօնական հանդիսութիւնը, Մուսա լերան յուշարձան-համալիրին կողքին: Ներկայ էին Լիբանանի մէջ Հայաստանի Հանրապետութեան հիւպատոս Սեդրակ Սարգսեան եւ ռազմական կցորդ Արթուր Դալիբալթեան, Հայկական երեսփոխանական պլոքի անդամ, երեսփոխան Յակոբ Թերզեան եւ պատկան մարմիններու ներկայացուցիչներ: Օրուան պատգամը ուղղեց ՀՅԴ Լիբանանի Կեդրոնական կոմիտէի ներկայացուցիչ Ալպեր Պալապանեան, որ հաստատեց, որ Մուսա լեռը հայ ժողովուրդի կամքի, միասնականութեան եւ գոյատեւելու անսասան վճռականութեան խորհրդանիշն է, իսկ Այնճարը` անոր շարունակութիւնն ու նոր բերդը: Մուսա լերան պատգամը մեզի կը թելադրէ չհրաժարիլ, չմոռնալ եւ չբաժնուիլ, այլ համախմբուած պահել մեր ազգային ինքնութիւնն ու հայրենիքի տեսլականը:

«Թող հերոսներուն աւանդը մեզ մղէ զօրացնելու Հայաստանը, պահպանելու սփիւռքի ու Այնճարի հայեցի դիմագիծը եւ միասնական ուժով կերտելու մեր ազգային ապագան», նշեց Ալպեր Պալապանեան:

Գեղարուեստական յայտագիրով իրենց մասնակցութիւնը բերին Այնճարի զոյգ վարժարաններու աշակերտները եւ Համազգայինի «Պարոյր Սեւակ» մասնաճիւղի «Կաքաւիկ» մանկապատանեկան երգչախումբը: Ազգային- հայրենասիրական երգերով հանդէս եկաւ երգիչ Ղազար Քէօշկէրեան: (Ալպեր Պալապանեանի խօսքը ամբողջութեամբ կու տանք հետագային):

Կիրակի, 20 սեպտեմբեր 2026-ին, առաւօտեան ժամը 10:00-ին, տեղի ունեցաւ սուրբ եւ անմահ պատարագ, հոգեհանգստեան արարողութիւն, մատաղի օրհնութիւն եւ բաշխում, ինչպէս նաեւ Հայաստանի անկախութեան վերականգնման 35-րդ տարեդարձի նշում եւ Եռագոյնի օրհնութիւն` հանդիսապետութեամբ Լիբանանի հայոց թեմի առաջնորդ Շահէ արք. Փանոսեանի, Այնճարի Ս. Պօղոս եկեղեցւոյ մէջ: Ներկայ էին Լիբանանի մէջ Հայաստանի դեսպան Սարմէն Պաղտասարեան, նախկին նախարար Վրէժ Սապունճեան, պատկան մարմիններու ներկայացուցիչներ եւ հաւատացեալներու հոծ բազմութիւն մը: