Այսօր՝ սեպտեմբերի 22-ին ՀՅԴ Հայաստանի Գերագույն մարմնի ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը հանդես եկավ մամուլի ասուլիսով:

Նա ամփոփեց խորհրդարանական շաբաթը և պատասխանեց լրագրողների հարցերին:

Նիկոլ Փաշինյանն իր վարած արտաքին քաղաքականությամբ Հայաստանին զոհից դարձնում է ագրեսոր, ասաց Իշխան Սաղաթելյանը`արձագանքելով Բաքվից հնչող հայտարարություններին, թե «հայկական կողմը Դադիվանքից մշակութային արժեքներ է գողացել»։

«Ադրբեջանը շարունակում է խեղաթյուրել իրականությունը և միջազգային հանրությանը հայկական պատմամշակութային ժառանգությունը ներկայացնում է աղվանական, ալբանական կամ այլ երկրի։ Դա մեկ պատճառ ունի, որպեսզի խուսափի էթնիկ զտման պատասխանատվությունից։ Դրա համար փորձում է վերացնել հայկական հետքը և ցույց տալ, թե Արցախը երբեք հայկական չի եղել։ Այդ հարցում Հայաստանի իշխանությունները շարունակում են օգնել, իրենց վարած քաղաքականությամբ լվանալ Ալիևի արյունոտ ձեռքերը և լեգիտիմացնել մեր նկատմամբ տեղի ունեցած բռնի տեղահանումը»,-ասաց նա:

Խոսելով Աժ կողմից ստեղծվելիք քննիչ հանձնաժողովի մասին, որն իբրև քննելու է Հայ Առաքելական եկեղեցում ստեղծված ճգնաժամը՝ Իշխան Սաղաթելյանը հայտարարեց.«Սա եկեղեցին վարկաբեկելու եւ Հայ Առաաքելական Սուրբ Եկեղեցու դեմ արշավի շրջանակներում պետք է դիտարկել: Սա հակաօրինական է, նման հանձնաժողովին մաս կազմելու ցանկություն չունենք։

Անդրադառնալով ընդդիմադիր ուժերի առաջանորդների, գործիչների կալանավորմանը՝ Իշխան Սաղաթելյանն ասաց. «Տեսեք, նախ՝ ի՞նչ է տեղի ունեցել. ընտրություններին մասնակցած երեք հիմնական ընդդիմադիր միավորների առաջին համարները կամ վարչապետի թեկնածուները գտնվում են անազատության մեջ: Ու ոչ միայն առաջին համարները, վարչապետի թեկնածուները, այլև թիմերից բազմաթիվ անդամներ, օրինակ՝ մեր գործընկեր Արթուր Սարգսյանը, որը հիմա կարող էր նստած լինել իմ կողքին: Բայց գիտեք՝ Արթուր Սարգսյանն անազատության մեջ է այսօր դատարանի այն պատճառաբանությամբ, որ իր մանդատը շարունակական է. այսինքն՝ քանի որ եղել է ութերորդ խորհրդարանի պատգամավոր և ութերորդ գումարման խորհրդարանը հաղթահարել է այդ անձեռնմխելիությունը, իններորդ գումարման խորհրդարանն այլևս կարիք չուներ հաղթահարելու, քանի որ մանդատը շարունակվում է: Եվ այս պատճառաբանությամբ Ազգային ժողովի պատգամավորը շարունակում է գտնվել անազատության մեջ, ինչպես նաև մեր թիմակիցներն ու բազմաթիվ մարդիկ, ովքեր մասնակցել են վերջին ընտրություններին: Այս իմաստով պետք է հստակ արձանագրել՝ ընտրություններին մասնակցած երեք խոշոր, հիմնական ուժերի առաջին համարները կամ վարչապետի թեկնածուները գտնվում են անազատության մեջ: Սա արդեն ամեն ինչի մասին ասում է, այստեղ չկա իրավական գործընթաց: Սա ուղիղ բռնաճնշում է և մեզ պարտադրված օրակարգի՝ Հայաստանին պարտադրված օրակարգի իրականացում»:

Խոսելով Տիգրանաշենի հանձման մասին՝ Իշխան Սաղաթելյանը հայտարարեց. «Հիմա շատ է խոսվում Տիգրանաշենի մասին, բայց ակնհայտ է, որ մինչև Տիգրանաշենը այս իշխանությունը պատրաստվում է տարածքներ զիջել Տավուշի հատվածում։

2024 թվականին, երբ որ Տավշում հանձնվում էին այդ տարածքները, մեր երկրում շատ մեծ հակազդեցություն տեղի ունեցավ։ Չկարողացանք կանխել, բայց այդ օրերին այդ դիմադրությունը շատ էական նշանակություն ուներ։ Նաև դա կանխելու համար են ընդդիմադիրները բանտում»։

Ըստ Իշխան Սաղաթելյանի՝ միակողմանի զիջումները չեն կանգնեցնում Ադրբեջանին, այլ, հակառակը, նոր պահանջների հող են նախապատրաստում։ Իշխան Սաղաթելյանի գնահատմամբ՝ գործող իշխանության քայլերը թուլացնում են Հայաստանի սահմանների պաշտպանունակությունը և ինքնիշխանությունը։ Իսկ Տիգրանաշենը հանձնելով՝ պատերազմը ոչ թե հեռացնում ենք, այլ մոտեցնում։ Նա նշել է, որ իշխանությունն ունի արտաքին աջակցություն, զգալի ռեսուրսներ և պետական ուժային կառույցների ներուժ, ինչի պայմաններում ընդդիմադիր ուժերի միասնական գործողությունները, իր կարծիքով, կարևոր նշանակություն են ստանում։ Այս ամենին դիմագրավելու համար ընդդիմության միավորմանը նա այլընտրանք չի տեսնում։ Համախմբումը պետք է տեղի ունենա, իսկ այն ուժերը, որոնք խուսափում են համախմբումից, պետք է հանրությանը պատշաճ բացատրություն տան՝ ինչու։

Մանրամասները՝ տեսանյութում