ԱԺ ՀՅԴ խմբակցության ղեկավար Արմեն Ռուստամյանը ցավում է, որ այսպիսի իրավիճակ է առաջանում արտաքին քաղաքականության կարևոր հարթակում` ՀԱՊԿ-ում: Այսօր, նոյեմբերի 19-ին, ԱԺ ճեպազրույցների ժամին նա ասաց. «Միանշանակ է, որ թե’ Բելառուսի, թե’ Ղազախստանի ղեկավարների հայտարարությունները չեն բխում կառուցողականության ոգուց և համագործակցության այն տրամաբանությունից, որը ՀԱՊԿ գործընկերության մեջ առկա է»:

Ռուստամյանի կարծիքով` մեր խնդիրները այնպես պետք է լուծենք, որ լրացուցիչ պրոբլեմներ չառաջանան:

«Ինչ վերաբերում է ՀԱՊԿ-ում մեր տեղը պահելու հարցին, մենք գիտեինք, հասկանում էինք, որ ՀԱՊԿ կանոնադրության մեջ կա բաց: Փաստորեն, կատարված փաստից հետո փորձ է արվում խնդիրը լուծել: Մինչև մեր տեղն այդտեղ հարվածի տակ դնելը, մինչև Խաչատուրովին հետ կանչելը, պետք էր նախատեսել այս ամենը, որպեսզի կատարված փաստից հետո չփորձեինք խնդիրը լուծել»,- ասաց նա:

Պատգամավորը հիշեցրեց, որ Յուրի Խաչատուրովին ՀԱՊԿ գլխավոր քարտուղարի պաշտոնում նշանակելը հարթ ու հանգիստ չի եղել: «Մենք տեսել ենք, թե ինչ դժվարությունների արդյունքում է այդ նշանակումը տեղի է ունեցել: Դեռ այն ժամանակ հակադրվող կողմեր կային, բայց այդ հարցը լուծվեց»,- ասաց նա:

Անդրադառնալով ՀՀ վարչապետի պաշտոնակատար Նիկոլ Փաշինյանի` ՀԱՊԿ անդամ երկրներին ուղղված հայտարարությանը` Ռուստամյանն ասաց, որ չի կարծում, թե մենք ունենք այնքան լծակ, որ մյուս երկրի ղեկավարներից պահանջենք կեցվածք պահպանել: «Պահանջել բառը պարտադրանք է ենթադրում: Եթե առաջիկա նիստում այդ տրամաբանությամբ սկսվի խոսակցությունը, դա կառուցողական տեղ չի տանելու: Ես տեսնում եմ, որ կրքերը բորբոքվում են, լարվածությունն ավելանում է, և եթե ՀԱՊԿ-ում առաջանելու են խնդիրներ, դրանից առաջին օգտվողը ոչ թե մենք ենք լինելու, այլ Ադրբեջանն է լինելու: Ես տեսնում եմ` ինչպիսի հրճվանք է արտահայտում Ադրբեջանի նախագահը տարբեր առիթներով` մեղադրանքի սլաքն ուղղելով Հայաստանի կողմը: Նա պնդում է, որ եթե այդ կազմակերպության մեջ խնդիր կա, ապա դա Հայաստանն է ստեղծում»,- նշեց պատգամավորը:

Ըստ նրա` հարցը ձևակերպումների մեջ է, և չպետք է թույլ տանք, որ մյուս կողմն օգտվի այդ ձևակերպումներից: «Այստեղ խնդիրն անձնական հեղինակությունը կասկածի տակ դնելու կամ ինչ-որ մեկի հեղինակության առավելությունն արձանագրելու մեջ չէ: Հարցը այդ կառույցի արդյունավետ աշխատանքն է, ձևավորված ավանդույթները, միմյանց հարգելու վարվելակարգն է: Այդ հարաբերություններն ինչքան բարեկամական լինեն, այնքան ընդհանուր գործը կշահի»,- եզրափակեց Ռուստամյանը:

«Արտաքին քաղաքականությունը շատ նուրբ արվեստ է, և այդտեղ ամեն մի խոսք պետք է ձևել-չափել»,- հայտարարեց Արմեն Ռուստամյանը` անդրադառնալով ՀԱՊԿ-ի շուրջ ստեղծված իրավիճակին:

Դիտարկմանը` տեսակետ կա, որ հին դիկտատորները իրենց փակ ակումբում չեն հանդուրժում նոր մարդու` Փաշինյանի ներկայությունը, և հարցին` կա՞ հավանականություն, որ Հայաստանը դուրս մնա ՀԱՊԿ-ից, և Ադրբեջանը անդամագրվի այդ կառույցին, նա արձագանքեց. «Այսպիսի ձևակերպումներից եմ ուզում, որ խուսափենք: Ի՞նչ է նշանակում` հին դիկտատորներ, արդեն վիրավորում ենք մարդկանց, որքան էլ մեր ներսում համոզումներ ունենք: Չի կարելի նման կերպ արտահայտվել: Մարդիկ շատ հեշտ ու հանգիստ այդ ամենին պատասխան են տալիս և ամբողջ աշխարհի առաջ իրենց հեղինակությունը պահպանում են` անկախ նրանից, թե ով իրենց ինչ կանվանի: Ի՞նչ իմաստ ունի, որ մենք մտնենք այդպիսի խոսակցությունների մեջ, մենք դրանից շահելո՞ւ ենք: Եթե Հայաստանը փոխարինվի Ադրբեջանով, մենք դրանից շահելո՞ւ ենք, ինչ է թե մի սրտահովանք խոսք ասացինք, դրանից ոգևորվենք: Արտաքին քաղաքականությունը շատ նուրբ արվեստ է, այդտեղ ամեն մի խոսք պետք է ձևել-չափել»:

Ռուստամյանը միևնույն ժամանակ վստահ է, որ ՀԱՊԿ կանոնադրությունը հեշտությամբ չի կարելի փոխել, որ Հայաստանը փոխարինվի այլ երկրով: Ըստ նրա` կարևոր է, որ կոնսենսուսի ոգին պահպանվի: «Մենք պետք է բոլորին մղենք նրան, որ համախոհության հասնելու ոգին չտուժի, չվերանա: Սրան է պետք ուղղել մեր ջանքերը: Չեմ կարծում, որ այստեղ կարող է խնդիր առաջանալ, Հայաստանին չեն կարող շրջանցել, Հայաստանն իր տեղն ու դերն ունի»,- նշեց նա:

Ըստ պատգամավորի`Բելառուսի և Ղազախստանի ղեկավարների հայտարարություններն էլ կառուցողականության հետ խնդիր ունեն և համագործակցության ոգուց չեն բխում, բայց մենք մեր հարցը պետք է ձևակերպենք այնպես, որ խնդիրը չտեղափոխվի անձնական դաշտ: «Մենք մեր պահանջները պետք է ներակայացնենք` ի շահ ՀԱՊԿ պայմանագրի տրամաբանության, այդ ձևաչափի նշանակության և այն նպատակների, որ պետք է ծառայի այդ կառույցը: Հայաստանն` իր ասելիքով և իր մոտեցումներով, շատ ճիշտ է, ունի հիմքեր, բայց այդ հիմքերը ներակայացնելու տեղը կա: Չպետք է առիթ տալ, որ հարցը տեղափոխվի անձնական դաշտ և դրանով ավելի բարդացվի ավելի կարևոր խնդրի լուծումը»,- կարծիք հայտնեց Ռուստամյանը:

«Ակնհայտ է, որ խորհրդարանական ընտրությունները պետք է տեղի ունենան պաթոսի մթնոլորտում, իսկ այդ պաթոսն արդեն բավականին լուրջ հնարավորություններ ու առավելություններ տալիս է մեկ քաղաքական ուժի»,- շեշտեց ՀՅԴ խմբակցության ղեկավար Արմեն Ռուստամյանը:

Ըստ պատգամավորի` այդ պաթոսի ֆոնին չեն լինի ընտրակեղծիքներ, իշխանությունը չի փորձի այլ ճանապարհներով ձայներ հավաքել, որովհետև դրա կարիքը չկա, սակայն ըստ նրա, դա ամենևին էլ չի նշանակում, որ ընտրությունները կլինեն ժողովրդավարական:

«Այս ընտրությունները չեն լինելու հիմնական միջոցը գնահատելու համար Հաայստանում արդյո՞ք հաստատվեց ժողովրդավարական ընտրությունների անցկացման ավանդույթ, թե ոչ: Երկրում միշտ էլ եղել են շատ լավ ընտրություններ, որը բոլորի կողմից էլ ընդունված է եղել, բայց դա չի բերել ժողովդավարության հաստատման: Մենք 90-91 թվականներին շատ լավ ընտրություններ ենք ունեցել, բայց դրանից հետո երկիրը շեղվել է, և մենք շատ երկար ժամանակ, մինչև հիմա այդ խնդիրն ունենք և չենք կարողանում վերագտնել ժողովրդավարական ընտրությունների բնականոն ընթացքը»,- ասաց նա:

Ռուստամյանն ընդգծեց, որ մյուս ընտրություններն արդեն ցույց կտան, թե այն պայմաններում, երբ իշխող ուժը վտանգ ունի իշխանությունը կորցնելու, այդ ժամանակ նորմալ ժողովրդավար ընտրություններ կանցկացվե՞ն, թե՞ ոչ: «Հիմա դրա կարիքը չկա, բայց դա չի նշանակում, որ մենք ունենք անշրջելի ժողովրդավարական ընտրությունների անցկացման ընթացք: Արդեն իսկ որոշակի անհավասար պայամններ կան, որ պաթոսի պայմաններում է տեղի ունենում ընտրությունները, բայց այլ ձևի միջամտություն չեմ տեսնում, չեմ էլ կարծում, որ այդպիսի բան տեղի կունենա: Ես չեմ ուզում թերագնահատել իշխանություններին: Նրանք ամեն ինչ անելու են, որ լավ լինեն ընտրությունները, որովհետև սա փորձություն է իշխանությունների համար, սա հիմք է տալիս ասելու, որ այս ընտրությունները նախորդների համամետ որակյալ կլինեն»,- ընդգծեց նա:

Ընդդիմություն լինում ես, երբ ձևավորվում է իշխանություն: «Ես պարտավոր չեմ նույն բառապաշարն օգտագործել, որպեսզի ապացուցեմ` ես ավելի ընդդիմություն եմ, քան մյուսները»,- ասաց Արմեն Ռուստամյանը` անդրադառնալով ՀՀԿ-ի այն հայտարարությանը, որ միակ ընդդիմությունն իրենք են:

Նրա կարծիքով` կրկնվում է նույն սխալը, ինչ մինչև հիմա եղել է: «Նույն բանն է` ով է ընդդիմություն, ով է կեղծ. այս բանից չե՞ն հոգնել մարդիկ: Այսինքն` ով հայհոյում է, նա է դառնում ընդդիմություն: Այս կատեգորիաներից պետք է դուրս գանք: Մենք չենք գնում ընտրություններին նրա համար, որ ցույց տանք` ամենալավը մենք ենք, մյուսներն անելիք չունեն: Մենք մտնում ենք այս ընտրապայքարի մեջ, որովհետև այս անցումային փուլում Դաշնակցությունը հասկանում է` ճիշտն ու սխալը որն է, թացն ու չորը որն է, լավն ու վատը որն է: Մնեք գնում ենք, որ կարողանանք երկիրը տանել այն ուղղությամբ, որ երաշխավորված լինի` մեր ձեռքբերումները չենք կորցնի, իսկ դրա վտանգը կա»,- ասաց Ռուստամյանը:

Պատգամավորը նշեց, որ իրենք քննադատել են այն ամենը, ինչը եղել է իրենց համար անընդունելի, և պաշտպանել այն ամենը, որը եղել է ընդունելի: Նա հիշեցրեց հոկտեմբերի 2-ին ԱԺ-ի ընդունած օրենքի նախագիծը և ընդգծեց. «Կառավարությունը պետք է սովորի Ազգային ժողովին չպարտադրել հլու-հնազանդ կատարել իր որոշումները, որովհետև Հայաստանում գործում է Սահմանադրություն, որում օրենսդիրն ու գործադիրը բաժանված են: Դա է ժողովրդավարության ամբողջ իմաստը: Եթե վաղը դուք մեծամասնություն էլ ունենաք, ձեր մեծամասնության հետ այդ լեզվով չխոսեք: Նրանք այդպես արեցին, որ մենք հետ կանչեցինք մեր նախարարներին, հետո նոր այդ շոուն տեղի ունեցավ հրապարակում` ստորագրեցին, թե իբրև գործից հանում են նախարարներին, որի իրավունքն էլ չունեին, պետք է դիմեին նախագահին, նա ստորագրեր»:

Ռուստամյանն ընդգծեց` ակնհայտ է, որ Դաշնակցությունն իր տեսակետները պահպանել է` անկախ նրանից, որ դաշտում է եղել: «Այդպես` Հանրապետականին շատ ավելի հեշտ էր, իրենք կառավարության մեջ չէին: Մեզ համար էր ավելի դժվար` լինելով կառավարության մեջ` դեմ գնալ վարչապետին: Նույնը` ընտրականի հետ կապված: Առաջընթաց էր ԸՕ-ն, մենք կողմ քվեարկեցինք, որ ՀՀԿ-ն դեմ է քվեարկել, ավելի ճի՞շտ ընդդիմություն էր: Ինչի՞ էր դեմ քվեարկում: Այդ առումով մեզնից ո՞վ է ավելի ճիշտ պահել իրեն: Նրանք դեմ են քվեարկել, որ այս ընտրակարգը մնա: Մեզ համար ավելի ընդունելի էր այս ԸՕ-ն, քան այն, ինչ հիմա մնաց: Ինքնանպատակ ընդդիմություն լինելու իմաստը ո՞րն է: Դու պետք է ընդդիմություն ու իշխանություն լինես հօգուտ պետության: Այս քաղաքական հայտարարությունները քարոզչական էֆեկտ ստեղծելու նպատակ ունեն, և չեմ կարծում` երկար կյանք կունենան»,- եզրափակեց նա: