Լրացմանը՝ նախկին իշխանությունների հետ կոալիցիա կազմելով հավատարի՞մ էր մնում այդ արժեքներին, Արթուր Խաչատրյանը նշեց. «Եթե խոսվում է նախկին իշխանությունների հետ կոալիցիա կազմելու մասին, այդ դեպքում պետք էր ազնիվ լինել գտնվել և խոսել նախորդ իշխանության կողմից Դաշնակցության իրականացրած ծրագրերի մասին, որոնք այսօր շարունակվում են, այդ դեպքում պետք չէր այդ 100 կետի մեջ նշել, այն է՝ համայնքներին տրվող սուբվենցիաները և այլն: Այդ դեպքում պետք չէ ասել, որ ամեն ինչ վատ է եղել, բայց դրանք շարունակել: Եթե նախորդ իշխանություններն այդքան կոռումպացված էին, ապա ինչու է, որ այսօրվա կառավարությունում կան նախկին իշխանության ներկայացուցիչներ»:

Դիտարկմանը՝ դուք նշել եք, թե որ ոլորտներում պետք է փոփոխություններ անի գործող իշխանությունը, արդյո՞ք իշխանության կողմից արձագանքներ եղել են, Դաշնակցական գործիչը նշեց.«Արձագանքներ եղել են բազմաթիվ, մեր մոտեցումը նույնն է եղել՝ խիստ մտահոգված ենք երկրում իրականացվող քաղաքականությունից, տնտեսական և ինստիտուցիոնալ քաղաքականությունից, ինչպես նաև Արցախի հարցում վարվող: Հստակ նշել ենք մեր մտահոգությունները՝ ինչ հարցում համաձայն ենք, ինչում՝ ոչ: Երբ նայում ես կառավարության նշած 100 նվաճումները, իրոք լրջանալու խնդիր կա: Մի հատ նայեք և տեսեք, թե ինչերն են նշել որպես հաջողություն. ամուսնություններն ու ամուսնալուծությունները իշխանության հետ բացարձակապես կապ չունեն, անլուրջ էր նաև թատրոն գնացած մարդկանց քանակը, ավել գրքերը, անլուրջ է նաև, որ մարդկանց հագուկապը դիտվում է որպես նվաճում: Կամ՝ նախարարությունների միավորումը, քանի դեռ չենք տեսել դրա ազդեցությունը, դա որպես նվաճում չենք կարող ներկայացնել»:

Անդրադառնալով ՀՀ երկրորդ նախագահ Ռոբերտ Քոչարյանի և Դաշնակցության համագործակցության հնարավորությանը, Արթուր Խաչատրյանը պատասխանեց. «Ի՞նչ հարցի շուրջ: Ես հասկանում եմ, որ faktor.am-ին ամենաշատը հետաքրքրում է Դաշնակցություն-Ռոբերտ Քոչարյան հարաբերությունները, բայց կասեմ՝ Ռոբերտ Քոչարյան-Դաշնակցություն համագործակցության հարց օրակարգում մենք չունենք»:

Իսկ այն, որ Ռոբերտ Քոչարյանի փաստաբանը ներկա էր Դաշնակցության հավաքին, Խաչատրյանը նշեց, որ հավաքը բաց էր բոլորի համար, և որ իրենք «ոհմակի նման չեն հարձակվում և Ազատության հրապարակից որևէ մեկին չեն քշում»:

Ինչ վերաբերում է դատարանների մուտքերն արգելափակելու վարչապետին կոչին, դրան հաջորդած գործողությունների ինքնաբուխ լինելուն, Խաչատրյանը նշեց, որ ինքնաբուխ ակցիայի դեպքում չեն կարող բոլորը նույն ժամին հավաքվեն և նույն ժամին էլ միահամուռ ցրվեն:

Այս համատեքստում Դաշնակցական գործիչը նշեց, որ վեթթինգի մասին լսել է միայն վարչապետից, մինդեռ այն ընդհանուր կոնցեպցիա է իրենից ներկայացնում:

«Պետք է մեխանիզմը ներկայացվի՝ և՛ վեթթինգի, և՛ անցումային արդարադատության: Ասում են՝ սատանան մանրուքների մեջ է: Անցումային արդարադատություն իրականացվել է այն երկրներում, որոնք անցել են քաղաքացիական պատերազմի միջով: Դուք կարծում եք, որ ՀՀ-ն քաղաքացիական պատերազմի միջո՞վ է անցել, մենք այս հարցում տարակարծիք ենք, որովհետև իշխանությունը ձևավորվեց այս երկրում գործող օրենքներին համապատասխան, հետևաբար օրենքները գործել են, օրենքներով են չէ՞ ձևավորվել իշխանությունը: Օրենքներով է եղել 2018-ի դեկտեմբերի 9-ի ընտրությունները: Այսինքն՝ ներկայիս օրենսդրական բազան ինչով չի բավարարում, որ գնում ենք անցումային արդարադատության կամ ինչ է այն իրենից ներկայացնում, եթե դուք ամբողջական փաստաթուղթ տեսել եք, կիսվեք ինձ հետ, ես կնայեմ և կպատասխանեմ»,-ընդգծեց նա:

Արթուր Խաչատրյանը միաժամանակ շեշտեց՝ դատական ամբողջական համակարգում խորը բարեփոխումներ են անհրաժեշտ՝ ոստիկանությունից մինչև քննչական մարմիններ, իհարկե, օրենսդրության սահմաններում:

«Այսինքն՝ եթե օրենքը խոչընդոտ է, պետք է նախևառաջ օրենքը փոխել, հետո փոխված օրենքով ինչ-որ բան անել, բայց, իհարկե, օրենքին հետադարձ ուժ չտալ»,-նշեց Արթուր Խաչատրյանը և լրացրեց. «Ես Բաղրամյան 26-ում մի քանի անգամ եմ եղել և իմ ներկայությամբ որևէ մեկը որևէ դատավորի չի զանգել: Դատական որոշումներ են կայացվել, որի նկատմամբ մարդիկ վստահություն չեն ներշնչել, դա զանգի հետ ի՞նչ կապ ունի»:

Ինչ վերաբերում է Մարտի 1-ի գործին, Խաչատրյանը նշեց՝ ամեն ինչ պետք է բացահայտվի, մեղավորները պետք է օրենքի ողջ խստությամբ պատժվեն, եթե մեկը հանցագործություն է գործել, անկախ նրանից, թե բարիկադի որ կողմում է:

Հարցին՝ ՀՅԴ-ն քաղաքական որ մասում է, Արթուր Խաչատրյանը պատասխանեց. «Ձախ, ձախ ժողովրդավարական, սոցիալ-դեմոկրատական: Մենք սոցիալիստ դավանող ձախ ընկերվարական ուժ ենք: Կամ՝ արտախորհրդանական ընդդիմություն, եթե դա եք հարցնում»:

ՀՅԴ ԳՄ անդամը նաև շեշտեց՝ այլևս որևէ կառավարության մաս չեն կազմի, որտեղ էական ազդեցություն չեն ունենալու:

yerkir.am