Բրբէնք, Քալիֆորնիայ.- Հիւսիսային Ամերիկայի Արեւմտեան Թեմի Առաջնորդ՝ Գերաշնորհ Տէր Յովնան Արքեպիսկոպոս Տէրտէրեանը հիւրընկալեց Հայ Յեղափոխական Դաշնակցութեան Արեւմտեան Միացեալ Նահանգների Կենտրոնական Կոմիտէի պաշտօնական պատուիրակութեանը: Հանդիպումը տեղի ունեցաւ Չորեքշաբթի, Յունիս 8ին, Քալիֆորնիայի Բրբենք քաղաքի առաջնորդանիստ Ս. Ղևոնդ եկեղեցու համալիրի մէջ: ՀՅԴի Կենտրոնական Կոմիտէից ներկայ էին ատենապետ Տարօն Տէր խաչատրեան, ԿԿի անդամ եւ նախկին ատենապետ Յովիկ Սալիպան եւ ԿԿի անդամ, Օրակարգ պաշտօնաթերթի անգլերէն բաժնի խմբագիր` Լեւոն Պարոնեանը:

ՀՅԴ պատուիրակութիւնը ջերմօրէն ընդունուեցաւ Տ. Յովնան Արք. Տէրտէրեանի կողմից: Սրբազան հայրը փոխանցեց իր խորին յարգանքը Դաշնակցութեան հանդէպ եւ շեշտեց, որ իր ամբողջ կեանքի ընթացքում ականատես է եղել Դաշնակցութեան կարեւոր դերակատարութեանը Հայաստան եւ սփիւռքի մէջ: ՀՅԴ պատուիրակութիւնն ևս իր ակնածանքն ու երախտագիտութիւնը յայտնեց Արեւմտեան թեմին եւ Հայ Առաքելական Եկեղեցու Մայր Աթոռին` հայ ժողովրդի հոգեւոր եւ այլ կարիքներին ծառայելու առաքելութեան համար հայրենիքում եւ սփիւռքում:

Առաջնորդը եւ ՀՅԴ պատուիրակութիւնը տեղեկութիւններ փոխանակեցին եւ քննարկեցին Ամերիկահայ համայնքին յուզող եւ իրենց համապատասխան կառոյցների օրակարգում գտնուող բազմաթիւ կարեւոր հարցեր:

Քննարկուած հարցերի թւում էին Արցախում եւ Հայաստանում ընթացող ճգնաժամերը, Արեւմտեան Միացեալ Նահանգների հայկական կրթական եւ այլ հաստատութիւնների վիճակը, համահայկական խնդիրների վերաբերեալ դիրքորոշումները եւ մեր կառոյցներում հրատապ լուծում պահանջող կազմակերպչական հարցերը:

Ինչ վերաբերում է Արցախին, առաջնորդը եւ ՀՅԴ պատուիրակութիւնը վերահաստատեցին իրենց փոխադարձ յանձնառութիւնը արցախեան հիմնախնդրի լուծմանը, որը երաշխաւորում է արցախահայութեան ինքնորոշման իրաւունքով: Առաջնորդը տեղեկութիւններ փոխանցեց Արցախի հետ կապուած մի քանի նախաձեռնութիւնների մասին, որոնցից մէկը վերաբերում է Ադրբեջանի կողմից օկուպացուած տարածքներում հայկական կրօնական վայրերի շարունակական ոչնչացման փաստագրման եւ կանխարգելման փորձերին:

ՀՅԴ պատուիրակութիւնը նաև տեղեկութիւններ է փոխանցել Արցախում մի քանի ընթացիկ նախաձեռնութիւնների մասին, նաեւ Սիւնիքում` հաշուի առնելով Սիւնիքի առջեւ ծառացած ռիսկերը` արցախեան պատերազմի պատճառով Ադրբեջանին որոշակի ռազմավարական դիրքեր զիջելուց յետոյ:

Շրջանային հարցերի շուրջ քննարկման ընթացքում առաջնորդ սրբազան հայրը սիրով առաջարկեց իր բարի կամեցողութիւնը աջակցելու համար Դաշնակցութեանը Արեւմտեան Միացեալ Նահանգներում` կազմակերպական տեղական մարտահրաւէրների ընդմիջից նաւարկելու և շարունակել ծառայել իր կարեւոր առաքելութեանը Հայաստանում եւ Սփիւռքում ներդաշնակ ձեւով եւ հիմնուելով իր կազմակերպական անդրդուելի սկզբունքների վրայ:

Առաջնորդը եւ ՀՅԴ պատուիրակութիւնը վերահաստատեցին իրենց փոխադարձ նուիրուածութիւնը` շարունակելու համագործակցութիւնը բոլոր ճակատներում` ծառայելու համր հայ ազգին ու ժողովրդին:

oragark.com