ԱՄՆ-ի հայ համայնքը ակցիա է իրականացրել ԱՄՆ-ում Հայաստանի հյուպատոսության առջև՝ ի աջակցություն Արցախի:

Ակցիայի մասնակիցները շրջափակել են Լոս Անջելոսում Հայաստանի հյուպատոսության շենքը և դատապարտել են ՀՀ իշխանությունների վարած պարտվողական քաղաքականությունը և Աղավնո, Բերձոր ու Սուս բնակավայրերի հանձնումը:

Ցուցարարները նաև «Աղավնոն, Բերձորը ու Սուսը հայկական են», «Ազատություն հայ ռազմագերիներին» գրություններով պաստառներ են դրել ԱՄՆ-ում ՀՀ հյուպատոսության շենքի դիմաց:

Երբ մտածում էինք կազմակերպել այս միջոցառումը, հարց էր առաջանում, թե ի՞նչի մասին պետք է խոսենք։ Խոսքը 2020թ․ նոյեմբերի 9-ի ստորագրված կապիտուլյացիայի մասին է։ Խոսքն այն է, որ այժմ ոչ թե խոսքի, այլ՝ գործի ժամանակն է։ Բայց, այնուամենայնիվ, չի կարելի լռել։ Ճիշտ նպատակ է հետապնդում մեր այս կազմակերպած 24 օրյա միջոցառումը, որը հետապնդում է 3 նպատակ. բողոքի ակցիայի ժամանակ ասաց իրավաբան Ռոբերտ Մակարյանը:

Նա մանրամասնեց 3 նպատակները.

«1․ Մեր դատապարտանքի խոսքը բարձրացնել Աղավնոյի, Բերձորի, Սոսի և բոլոր մյուս տարածքների հանձնումը, որոնք կատարվում են այսօր Հայաստանի դավաճան իշխանությունների կողմից։

2․Իսկ Ի՞նչ նպատակ է հետապնդում ստորագրված փաստաթուղթը։ Փաստաթուղթը ունի հավելվածներ, պայմանավորվածությունններ, որոնք առաջ ենք գալիս այս տարիների ընթացքում։

3․Ուղերձը ուղղված է Հայաստանի դավաճան իշխանություններին, նրանց ասելու, որ այսօրվա այս միջոցառմանը այստեղ հավաքված մեր հայրենակիցները եկել են ասելու, որ ձեր կողմից գործադրված բոլոր շանտաժի ձևերը ոչ մի կերպ չեն կարող ազդել մեր շարժման, պայքարի վրա»,- ասաց նա:

ՀՅԴ Արևմտյան Ամերիկայի Կենտրոնական կոմիտեի ներկայացուցիչ Տարոն Խաչատուրյանն իր խոսքում ասաց․ «Հայ աշխարհի ներկա իրավիճակը թոհուբոհի մեջ է, Սփյուռքը, Հայաստանն ու Արցախը լուրջ տագնապի մեջ են։ Հավանաբար 1915-ից հետո ամենածանրակռիշ օրերն է, որ ապրում ենք։ Ազգային և ապազգային թևերի բախում է տեղի ուենում հայության մեջ, այդ բախումը կշարունակվի։ Ամեն անգամ, երբ ազգային թևը գերակշիռ լինի, մենք հաջողություններ կարձանագրենք, երբ ազգային թևը գերակշիռ էր կերտեցինք մայիսի 28, կերտեցինք 92, 93, 94-ի Արցախը»։

Նա նշեց, որ երբ ապազգային թևը գերակշիռ էր, ունեցանք Կարսի անկում, Արցախյան կորուստներ, 44-օրյա պատերազմում պարտություն, կունենանք նաև Բերձորի, Սոսի, Աղավնոյի հայաթափում ու հանձնում։

«Շատ դժվար է գտնել երկրներ, ուր ղեկավարությունը կվարի ապազգային և ազգադավ քաղաքականություն, այսօր Հայաստանը դժբախտաբար 2018 թվականի մայիսից ի վեր այդ ընթացքի մեջ է»,- ասաց նա։

Նշենք, որ ՀՅԴ ԱՄՆ-ի Հայ երիտասարդաց դաշնակցության անդամներն ու աջակիցներն այսօր Լոս Անջելեսում ՀՀ հյուպատոսության շենքի առջև տեղի ունեցած հանրահավաքից հետո, իբրև Փաշինյանի իշխանության թուրքամետ և պետականակործան քաղաքականության դատապարտման նստացույց, գիշերելու են հյուպատոսարանի շենքի առջև:

yerkir.am