Արցախի շրջափակման 100-րդ օրուան առիթով, կազմակերպութեամբ ՀՅԴ Լիբանանի պատանեկան միութիւններու Ընդհանուր վարիչ մարմինին եւ մասնակցութեամբ Լիբանանի պատանեկան միութիւններուն, երեքշաբթի, 21 մարտ 2023-ին, երեկոյեան ժամը 6:30-ին, «Շաղզոյեան» կեդրոնէն ընթացք առաւ զօրակցական ջահերթ:

Աւելի քան 100 պատանիներ ազգային-յեղափոխական երգերու ընկերակցութեամբ, կանչերով, ջահերով եւ Արցախի մեծ դրօշով շրջեցան Պուրճ Համուտի թաղամասերուն մէջ: 100-ամեայ պատանեկան միութիւններու ներկայութիւնը ոգեւորեց շրջանի բնակիչները, որոնք խանդավառութեամբ դիմաւորեցին եւ յայտնեցին իրենց աջակցութիւնը:

Աւարտին, պատանիները համախմբուեցան Պուրճ Համուտի Նահատակաց յուշակոթողին դիմաց, ուր ՀՅԴ Լիբանանի պատանեկան միութիւններուն անունով խօսք արտասանեց Վանա Աւետիսեան: Ան ըսաւ. «Ահաւասիկ 100 օր անցած է Արցախի դէմ Ազրպէյճանի պարտադրած անարդար, անմարդկային եւ միջազգային օրէնքով անօրէն նկատուող շրջափակման: 100 օր շարունակ Արցախի հերոսական ժողովուրդը տոկաց ու կը շարունակէ տոկալ` հաստատելով, որ հայ ժողովուրդը օժտուած է պայքարի ոգիով եւ թշնամիին ամէն գնով դէմ դնելու աննկուն կամքով»:

Աւետիսեան ըսաւ, որ ներկայ կացութեան մէջ դաշնակցական պատանիները պէտք է բարձրաձայն հաստատեն, որ Արցախը մինակ չէ՛, Արցախցին մինակ չէ՛, եւ Ազրպէյճանի վերահսկողութեան տակ գտնուող գրաւուած Արցախի հողերը մե՛րն են:

Իր խօսքի աւարտին պատանին եզրափակեց, «Վերջապէս, իբրեւ 100-ամեայ ՀՅԴ Լիբանանի պատանեկան միութիւններ, անգամ մը եւս կը հաստատենք, որ մեր բոլորին երազը մէկ է: Մեր ճամբան մեզ միայն կրնայ տանիլ դէպի Սեւրի դաշնագիրին մէջ ամրագրուած ազատ, անկախ եւ միացեալ Հայաստան, Արցախով Հայաստան, մէկ Հայաստան, համայն հայութեան Հայաստան»:

Արցախի զօրակցական հաւաքը փակուեցաւ «Յառաջ, նահատակ» քայլերգով: