ՀՅԴ Բյուրոյի ներկայացուցիչ Հակոբ Տեր–Խաչատուրյանի ելույթը «Նեմեսիս» գործողության հերոսների հիշատակը հավերժացնող հուշարձան- աղբյուրի մոտ

Սիրելի ընկերներ, սիրելի հարազատներ

Այսօր այստեղ հավաքվել են Հայ Յեղափոխական Դաշնակցության ընտանիքի ներկայացուցիչները, որպեսզի հարգանքի արժանի տուրք մատուցենք 1919 թվականին Երեւանում գումարված ՀՅԴ Ընդհանուր ժողովի՝ «Հատուկ գործողություն» անվամբ որոշումը իրագործած մեր նվիրյալներին՝ լինեն նրանք ծրագրող, կազմակերպող, թե գործադրող, որոնք փրկեցին մեր ժողովրդի արժանապատվությունը, վերականգնեցին պայքարելու եւ ամեն գնով մեր դատին նվիրվելու հույսը: Այսօր այստեղ ենք, մեկ անգամ եւս հիշեցնելու, որ մեր տառապած ժողովուրդը, որքան էլ որ գլխատվեց, որքան էլ որ ենթարկվեց ցեղասպանության, չունեցավ վախճան, ինչպես ծրագրել էր թշնամին, այլ ընդհակառակը՝ Ցեղասպանության սկզբից ընդամենը երեք տարի հետո, 1918-ին կերտեց, փառահեղ էջը՝ Հայաստանը վերադարձնելով Անկախ պետականության միջազգային ընտանիքին եւ ոչնչից կերտեց պետություն: Ապա, նկատի ունենալով, որ նույն ինքը Օսմանյան կայսրության վերջին օրերին արդեն իսկ վճռված էր ցեղասպան թուրքերի ճակատագիրը, եւ նրանք մահապատժի էին դատապարտված, բայց մահապատիժը չէր իրականացվել, անհրաժեշտ էր, որ Հայ Յեղափոխական Դաշնակցությունը, որպես համահայկական այն կառույցը, որ կարող էր իրագործել այն, ինքը ստանձնեց այդ պատասխանատվությունը, եւ այդ ճիվաղների հետեւից աշխարհով մեկ գնալով, մեկ առ մեկ զգետնեց նրանց: Թե ցեղասպան թուրքին , թե չարադավ ազերի այն մուսավաթական ոճրագործներին, որոնք հայի արյամբ էին սնված:

Այսօր մենք խոնարհվում ենք աշխարհի տարբեր կողմերից ու բնագավառներից մեր այս ընկերների հիշատակի առաջ՝ քաղաքական դեմքեր լինեն, ինչպես Արմեն Գարոն, թե հայ գրականության տիտաններից՝ ինչպես Ավետիք Իսհակյանը, թե հայ վրիժառու բազուկներ՝ ինչպես այստեղ նշված մեր բոլոր հերոսները՝ Միսաքյան, Թոռլաքյան, Թեհլիրյան, Գևորգյան, Ծաղիկյան և շատ-շատ ուրիշներ և նաեւ բոլոր նրանք, որոնց անուններն այստեղ նշված չեն, բայց որոնք լուրջ երախտիք ունեն Նեմեսիսի գործողության մեջ:

Մեր արժանապատվության վերականգնումն էր այս արդարահատույց գործողությունը: Այս տղաները ոչ միայն փրկեցին հայության պատիվը, ոչ միայն վերականգնեցին հայության վճռականությունը՝ տեր կանգնելու իր ապագային, իր մարտական ոգուն, նրանք նաև ներշնչանք եղան մի քանի տասնամյակ հետո Հայ դատի ուժական պայքարի նոր հերոսների համար, որոնք իրենց ուսերին վերցրին արդարությունը վերականգնելու գործը և 1970-80-ական թվականներին ճեղքեցին միջազգային լառության պատը, որով շրջապատված էր Հայոց ցեղասպանության իրողությունը: Ապա եկավ ազատամարտիկների նոր սերունդը որ, ամբողջությամբ նվիրվեց Արցախի ազատագրության դատին: Խոր հարգանք, մեր այս սերնդին որ մեկ անգամ ևս ցույց տվեց , որ կյանքը պայքար է եւ պայքարը կյանք:

Մենք խոնարհվում ենք հարգանքով, ակածանքով այս հերոսների հիշատակի առաջ եւ մեր գոհունակությունն ենք հայտնում, որ վերջ ի վերջո արժանավոր հուշարձանով նաեւ նվիրականացավ նրանց հիշատակը մեր հայրենիք Երեւանի կենտրնում: Խոր հարագանք եւ պատիվ այս սերնդին: