Կուսակցութիւններու պատասխանատուներու կատարած իր այցելութիւններու ծիրին մէջ, Լիբանանեան կուսակցութիւններու եւ ազգային ուժերու եւ անձնաւորութիւններու հանդիպումը ներկայացնող համակարգումի մարմինը այցելեց ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի: Խորհրդակցութիւնը կեդրոնացաւ տեղական թէ արտաքին իրադարձութիւններուն վրայ:

Հանդիպումի աւարտին անոնք հրապարակեցին հաղորդագրութիւն մը, ուր քննադատեցին կարգ մը կողմերու ցուցաբերած կեցուածքը: «Լիբանանի մէջ քաղաքականութեան անունով ոմանց որդեգրած քայլերը պարզապէս «յիմարներու ողբերգութիւն» կարելի է անուանել», նշեց հաղորդագրութիւնը` դիտել տալով, որ երկրի տագնապներուն լուծման բնական ու հեզասահ ընթացքը կը կայանայ նախագահի ընտրութեան շուրջ երկխօսութեան մէջ:

Հաղորդագրութիւնը նաեւ քննադատեց «սիոնական յարձակումները պաղեստինցի խիզախ ժողովուրդին վրայ` փորձելով ջլատել անոր դիմադրողական կամքը»:

Այս առիթով հաղորդագրութիւնը նոյնպէս բուռն կերպով քննադատեց Ազրպէյճանի կողմէ աւելի քան 180 օրերէ ի վեր Արցախի շրջափակումը, որ շրջանի բնակչութիւնը կը մատնէ ծանր տագնապի ու կ՛արգելակէ մարդասիրական օժանդակութեան փրկարար բոլոր քայլերը, անտեսելով միջազգային օրէնքներն ու միջպետական համաձայնութիւնները: Այս գծով ժողովականները կոչ կ՛ուղղեն միջազգային ընկերութեան` «անյապաղ ձեռնարկելու գործնական քայլերու, վերջ տալու համար այս անմարդկային կացութեան», եզրափակեց հաղորդագրութիւնը: