ՅԱԿՈԲ ԲԱԳՐԱՏՈՒՆԻ

Ընկեր Սարգիս Զէյթլեանի յիշատակով գօտեպնդուելու եկած սիրելի՛ մուսալեռցիներ եւ հայրենակիցներ,

Առաջին հերթին` շնորհակալութիւն «Կարմիր լեռ» կոմիտէին եւ ընկ. Յակոբ Ճամպազեանին` ընկ. Զէյթլեանի կիսանդրիի հաստատման եւ բացման այս հանդիսութեան համար, հանդիսութիւն, որ բազմակողմանի նշանակութիւն ունի:

Կը պատկանիմ բախտաւորներու այն սերունդին, որ վայելած է ընկ. Ս. Զէյթլեանի եւ իր նմաններուն ներկայութիւնը, լսած է զայն, աշխատած է անոր հովանիին տակ ու շատ բան սորված է անկէ:

ՀՅԴ Լիբանանի երիտասարդական միութենէն, ՀՅԴ Զաւարեան ուսանողական միութիւն, Մամլոյ դիւան, պատերազմի օրերուն, բանակումներ թէ ժողովական կեանք` միշտ տեսած ենք զինք ու ապրած` ընկ. Սարգիսի շունչը:

Ինծի համար ընկ. Սարգիս Զէյթլեանի անձը կը բնութագրուի հետեւեալ յատկանիշներով.

– Գաղափարական ուժեղ մարդ,

– Կազմակերպական բացառիկ կարողութիւններու տէր,

– Քաղաքական խորաթափանց եւ կանխատեսող միտք,

– Մարտական անհատականութիւն,

– Աշխատանքի, բծախնդիր եւ յարատեւ աշխատանքի մարդ:

Պահ մը երեւակայենք ընկեր Սարգիս Զէյթլեանին անձը: Հո՛ն, ուր որ ըլլար, փոթորիկ էր: Անոր մուտքը, քայլուածքը, շարժուձեւը, արտայայտած միտքերը, երբեմն երիտասարդութեան հետ հակասական կարծիքներու բախում ստեղծելու դաստիարակչական մօտեցումը (այսօրուան քննական մտածողութենէն տասնամեակներ առաջ) իրենց ամբողջութեան մէջ փոթորիկ էին` ընկ. Սարգիսի անձով մարմնաւորուած:

Ընկ. Զէյթլեան առեւանգուեցաւ, որովհետեւ ուժեղ էր եւ կը պատկանէր, կը ղեկավարէր ուժեղ կուսակցութիւն:

Ինք եւ իր գործակիցները վտանգ էին բոլոր անոնց, որոնք չէին ուզեր հայութիւնը ուժեղ տեսնել եւ կը ձգտէին սադրանքներ իրականացնել:

Ուրեմն պէտք էր հարուածել հայութեան ուժը:

Պէտք էր հարուածել ՀՅ Դաշնակցութիւնը:

Հարուածել ՀՅԴ-ն` կը նշանակէր հարուածել հայութիւնը:

Հետեւաբար, հարուածեցին ընկ. Սարգիս Զէյթլեանը, հարուածեցին ընկ. Աբոն եւ ընկ. Սարգիս Ազնաւուրեանը:

Հարուածը եկաւ Թուրքիոյ կողմէ` ուղղակի կամ վարձկան հայանուն դաւաճաններով:

Իսկ այս կիսանդրի՞ն:

Կիսանդրին պարզ գեղարուեստական կոթող մը չէ, կամ` պատուանդանի վրայ դրուած պրոնզեայ արձան:

Ա՛յս կիսանդրին ընկ. Սարգիս Զէյթլեանն է:

Անիկա յուշարար է, զգաստութեան հրաւէր: Իրեն հետ ապրելու, իրմէ ներշնչուելու հրաւէր է այս կիսանդրին:

Երբ մուտք գործենք այս շրջափակէն ներս, նախ պարտինք բարեւել ընկ. Սարգիս Զէյթլեանին ու լրջանալ եւ տեսնել, թէ ի՛նչ խորհուրդ կու տայ կիսանդրին:

Ան հրաւէր է խիզախութեան, հրաւէր է խրոխտ կեցուածքի, հրաւէր է քաղաքական հասունութեան, հրաւէր` հայկական օրիանթացիայի, անզիջող հայու ազգային արժէքներն ու հայ ժողովուրդի շահերը գերադաս նկատող աննկուն պայքարի ու խիստ հրաւէր, զգօնութեան հրաւէր` ուղղափառ եւ ուղի դաշնակցականութեան:

Սիրելինե՛ր,

Այս արձանը բազմիմաստ, խորախորհուրդ արժէք է:

Զգաստութեան հրաւէր է` իրաւ դաշնակցական աւանդի վերականգնման, իրաւ հայու արի տիպարի վերընձիւղման:

Փոթորիկ էր ընկեր Սարգիս Զէյթլեան:

Իսկ այս կիսանդրին փոթորիկ ընկեր Սարգիս Զէյթլեանի հրաւէրն է նոր փոթորիկներու:

* Խօսք` արտասանուած 3 օգոստոս 2023-ին, Այնճարի մէջ` Սարգիս Զէյթլեանի կիսանդրիի բացման հանդիսութեան:

«Ազդակ»