Ազատության հրապարակում այսօր՝ սեպտեմբերի 2-ին, Արցախի Հանրապետության անկախության 32-ամյակի առթիվ, մեկնարկեց ընդդիմության հանրահավաքը, որը կրում էր «SOS Արցախ» կարգախոսը:

Հանրահավաքի նպատակն էր Հայաստանի ու Սփյուռքի միասնական ձայնը հնչեցնել Արցախի ու համայն հայության համար այս ծանր ու վճռական փուլում:

Հանրահավաքի մեկնարկին՝ Հայաստանի ու Արցախի պետական օրհներգերից հետո Շուշան Պետրոսյանը կատարեց «Երազի իմ երկիր հայրենի» երգը։

Տերունական աղոթք եւ օրհնության խոսք փոխանցեց Տավուշի թեմի առաջնորդ գերաշնորհ Բագրատ արքեպիսկոպոս Գալստանյանը:

Իր խոսքում նա երախտիքի խոսք հղեց Արցախի անկախության համար նահատակվածներին և Ազատության հրապարակում գտնվող հանրահավաքի մասնակիցներին։

«Ուզում եմ ողջ սրտով, որդիական սիրով ու խոնարհությամբ ձեզ բոլորիդ, իմ հոգևոր եղբայրների հետ միասին, բերել Հայոց հայրապետի, Ամենայն Հայոց կաթողիկոսի՝ Գարեգին Բ հայրապետի օրհնությունը, սերը, ողջույնը, քաջալերանքը, աղոթքը մեր ողջ կյանքի վերելքների ու հաղթանակների համար։ Վեհափառի օրհնությունը, ողջույններն ու սերը ձե՛զ՝ սիրելի, իմ շատ սիրելի ժողովուրդ։

Ես հաղթեցի աշխարհին՝ այս խոսքերը հնչեցին մեր տիրոջ կողմից այն ժամանակ, երբ շուրջբոլորը տրտմություն էր, կասկած, հուսահատություն, ուրացում, անորոշություն, վախ՝ պատված միայնության և լքվածության զգացումով։ Առջևում տառապանք էր ու խաչելությունը, մարդկային մտքի համար անհասկանալի ու անընդունելի, սակայն այդ է հաղթանակի ու հարության ճանապարհը։ Եվ հենց այս մթնոլորտում է հնչում տերունական պատգամը։ Աշխարհում դուք նեղություն եք կրելու, բայց քաջալերվեցեք, որովհետև ես հաղթեցի աշխարհին։ Այս անվերջանալի պատգամը հնչում է նաև այսօր:

Հանրահավաքին ելույթներ ունեցան շուշեցի Նարե Սիմոնյանը, «Հայաքվե» նախաձեռնության համակարգող Ավետիք Չալաբյանը, «Բաբոն տեր ա» նախաձեռնությունը, 44-օրյա պատերազմում զոհված Վաչագան Մանուկյանի հայրը՝ գրող Խաչիկ Մանուկյանը, քաղաքագետ Թևան Պողոսյանը, 44-օրյա պատերազմին զոհված Հակոբ Ռոստոմյանի հայր՝ Արա Ռոստոմյանը, «Մայր Հայաստան» դաշինքի առաջնորդ Անդրանիկ Թեւանյանը, ԱԺ «Պատիվ ունեմ» խմբակցության քարտուղար Տիգրան Աբրահամյանը, Ղարաբաղյան շաժման ակունքներում կանգնած, Ղարաբաղ կոմիտեի ղեկավար Վազգեն Մանուկյանը, ՀՅԴ Հայաստանի ԳՄ ներկայացուցիչ Իշխան Սաղաթելյանը:

Տեսաուղերձով հանրահավաքի մասնակիցներին իր ողջույնի խոսքը փոխանցեց ՀՅԴ Բյուրոյի անդամ, Ֆրանսահայ կազմակերպությունները համակարգող խորհրդի համանախագահ Մուրադ Փափազյանը:

Այս հանրահավաքը հերթական հանրահավաք չէ, այն ունի առաքելություն. իր ելույթում նշեց Իշխան Սաղաթելյանը։

«Այսօր հայ ժողովուրդը աշխարհիի տարբեր կողմերում միջազգային հանրությանը, մեր բարեկամ, դաշնակից երկրներին ու մեր թշնամիներին շատ հստակ և ուղիղ ասում է՝ Հայաստանի իշխանությունների մեջտեղ բերած հանձնվելու օրակարգը հայ ժողովրդի օրակարգը չէ, հայ ժողովուրդը մերժում է այդ օրակարգը և պատրաստ է շարունակել պայքարը իր հայրենիքի համար»:

Իշխան Սաղաթելյանը հայտարարեց, որ հաջորդ հանրահավաքը չի ուշանալու, նշեց, որ իշխանափոխության հասնելու շուրջ ընդդիմադիր դաշտում ակտիվ քննարկումներ են ընթանում:

«Սա մեկ հոգու, մեկ անձի որոշելիք չէ, սա արժանապատվության, մինչեւ վերջ գնալու պայքար է, մեր հաջորդ հանդիպումը շատ չի ուշանալու, Արցախը երբեք Ադրբեջանի կազմում չի լինելու: Չհիասթափվե΄լ, չհուսահսատվե΄լ, չլռե΄լ եւ գնալ մինչեւ վերջ»,- նշեց նա:

Հանրահավաաքն ավարտվեց Շուշան Պետրոսյանի հանրահայտ «Արցախ» երգի կատարմամբ:

Նշենք, որ հանրահավաքին ներկա էին նաև ՀՀ 2-րդ եւ 3-րդ նախագահներ Ռոբերտ Քոչարյանը եւ Սերժ Սարգսյանը: