ՀՅԴ Արևմտեան ԱՄՆի Կենտրոնական Կոմիտէի նախաձեռնութեամբ շաբաթ, Սեպտեմբեր 16 երեկոյեան Րաֆֆի և Մարալ Սարգիսեանների բնակարանում կազմակերպուել էր հանգանակային ձեռնարկ շրջանի կազմակերպութեան ազգային և համայնքային ծառայութիւնների օգտին:

Միջոցառմանը ներկայ էին աւելի քան հարիւր ընկերներ և բարեկամներ: Օրուայ հանդիսավարն էր կենտրոնական կոմիտէի անդամ՝ Յովիկ Սալիպան: Նա թէ իր բացման խօսքի մէջ գնահատեց բոլոր այն անձանց որ այս դժուարին օրերին կանգնած են կազմակերպութեան կողքին և կոչ արեց բոլորին որ շարունակեն իրենց նուիրաբերումը յօգուտ մեր ազգին ու հայրենիքին: Ներկաներին իրենց ներկայութեան և շրջանիս աշխատանքները հովանաւորելու համար ողջունեց կենտրոնական կոմիտէի ատենապետ Տարօն Տէր Խաչատուրեանը, որը նաև հակիրճ կերպով ներկայացրեց մեր երկրի, ժողովրդի և ինչու չէ համայնքի քաղաքական և հոգեմտաւոր կացութիւնը յատկապէս 44-օրեայ պատերազմի ու նրա հետևանքների լոյսի տակ:

Միջոցառման առաջին բաժինը սկսուեց դուդուկի նուագակցութեամբ, որին փոխարինեցին հայազգի լեգենդար երգիչ Յարութ Փամբուկճեանը և յեղափոխական երգերի անզուգական մեկնաբան Գառնիկ Սարգիսեանը: Յարկ ե նշել, որ զոյգ երգիչները իրենց սիրայօժար մասնակցութեամբ իրենց նպաստը բերին հանգանակային միջոցառման յաջողութեանը:

Ազգային և յեղափոխական երգերի, ոգու և նուիրաբերումի սքանչելի երեկոյ կայացաւ Սարգիսեանների բնակարանում, ուր աւելի քան 150 հազար դոլար հանգանակուեց համայնքային և ազգային աշխատանքների համար: