Հակառակ մեզ շրջապատող եւ օրէ օր խեղդող տագնապներուն, թէ՛ լիբանանեան եւ թէ՛ հայկական իմաստով, չենք կրնար զանց առնել Ուսուցչաց տօնը, մանաւանդ Հայ ուսուցիչի տօնը:

Ու յատկապէս այս օրերու դժնդակ պայմաններուն մէջ կարեւոր շեշտադրումով կը ներկայանայ Ուսուցչաց տօնը:

Խօսիլ ուսուցիչի մասին համազօր է խօսիլ մօր մասին, Հայ ուսուցիչը` նման հայ մօր:

Աղբիւրը` իւրաքանչիւրիս կազմաւորումին:

Հիմը` մեր բոլորին անհատականութեան կերտման:

Ճանապարհը` մեր իրագործումներուն, անհատական թէ ընդհանրական մակարդակներու վրայ:

Կ՛արժէ շեշտել անգամ մը եւս:

Ազգապահպանման գործը անկարելի է կատարել առանց հայ դպրոցի հիմը եղող հայ ուսուցիչին:

Մարդակերտումը անկարելի է առանց հայ ուսուցիչին:

Արժէքային համակարգը անկարելի է պաշտպանել ու պահպանել առանց հայ ուսուցիչին:

Հայ եկեղեցին շէնք կը մնայ, երբ հայ ուսուցիչը կը դադրի սերունդ պատրաստելէ:

Հայկական մշակոյթը, միութիւններն ու կառոյցները, հայոց լեզուն կը դադրին իրենց հայկականութենէն, երբ կը դադրինք արժեւորելէ հայ ուսուցիչը:

Հայ դպրոցը կը պահէ հայը, իսկ առանց հայ ուսուցիչի հայ դպրոցը կը վերածուի սոսկ առեւտրական-կրթական կառոյցի:

Տակաւին կը հաւատանք հայ ուսուցիչի առաքելութեան:

Հաւատքը առանձինն բաւարար չէ:

Հաւատքին հետ, համոզումն ու գործն է հայ ուսուցիչ պատրաստելու, ուժեղացնելու անոր առաքելութիւնը, յարգելու անոր ասպարէզը, գնահատելու անոր իրագործումները եւ արժեւորելու զինք ամէն իմաստով:

Հայ ուսուցիչը առեւտրական հասկացողութեամբ պաշտօնեայ չէ:

Ոչ ալ այլ ասպարէզի մը անյաջող անձ:

Ոչ ալ կամակատար` հաշուապահի մտածողութեամբ առեւտրական գործառնութիւններ վարող եւ դպրոցը շահի միջոց նկատող ամիրայական մտածողութեան:

Մանաւանդ, ու ցաւով կ՛արձանագրենք, ուսուցիչը մուրացկան չէ եւ ո՛չ ալ այս կամ այն բարերարին գութը հայցող գաւառներու մտածողութենէն եկող «վարժապետ»:

Հայ ուսուցիչը իր առաքելութեամբ սրբազան գործի ռահվիրան է, ու պարտաւոր ենք իրենց հանդէպ երախտապարտ ըլլալ:

Առանց հայ ուսուցիչի կարելի չէ ազգապահպանումի մասին նոյնիսկ մտածել:

Երախտապարտ ենք բոլորին:

Անոնց, որոնք մեզ «մարդ»-ու վերածեցին:

Մեր ուսուցիչներուն վարձքը կատար:

Հերոս էք դուք ձեր գործին մէջ, ձեր կենդանութեան:

Հերոս էին բոլոր անոնք, որոնք եկան, գործեցին ու մեկնեցան:

Պատի՛ւ ձեզի, սիրելի՛ ուսուցիչներ:

Յ. ԲԱԳՐԱՏՈՒՆԻ