Լիբանանի մէջ Ֆրանսայի դեսպան Էրվէ Մակրօ այցելեց Հայկական երեսփոխանական պլոքի եւ ՀՅԴ Լիբանանի Կեդրոնական կոմիտէի ներկայացուցիչ Յակոբ Բագրատունիին, «Շաղզոյեան» կեդրոնին մէջ: Հանդիպումին ներկայ էր նաեւ երեսփոխան Յակոբ Թերզեան:

Մէկ ժամ տեւած հանդիպումին, դեսպան Մակրօ ներկայացուց Ֆրանսայի մօտեցումները լիբանանեան եւ շրջանային անցուդարձերուն մասին: Յատուկ անդրադարձ կատարուեցաւ հնգեակի աշխատանքներուն եւ այդ ուղղութեամբ լիբանանեան կողմերու դիրքորոշումներուն:

Ֆրանսայի դեսպանը շեշտեց նախագահի ընտրութեան առաջնահերթութիւնը եւ Կազայի ու հարաւային Լիբանանի կացութենէն զայն անջատելու անհրաժեշտութիւնը, ինչպէս նաեւ հնգեակին ճիգը` յաջողցնելու համար նախագահի ընտրութեան համար ներքին խորհրդակցութիւններու ճամբով համաձայնութեան գոյացումը:

Դեսպան Մակրօ մօտէն ծանօթացաւ Լիբանանի հայութեան իրավիճակին, Հայկական երեսփոխանական պլոքի եւ ՀՅ Դաշնակցութեան դիրքորոշումներուն:

Հանդիպումի ընթացքին քննութեան նիւթ դարձաւ նաեւ Արցախի դէմ կատարուած պատերազմը եւ ծրագրուած կերպով ցեղային զտումը, ինչպէս նաեւ Հայաստանի սպառնացող ազրպէյճանական եւ թրքական վտանգներուն սաստկացումը: