ՀՅԴ Արևմտեան Ամերիկայի 58-րդ Շրջանային ժողովը տեղի ունեցաւ 2024 թուականի Յունիսի 28-30-ը Մոնթէ Բելլոյի Հայ Կենտրոնում, շրջանիս 17-կոմիտէութիւնների, Շանթ Ուսանողական Միութեան և ՀԵԴի պատւիրակութիւնների մասնակցութեամբ։ Ժողովին մասնակցում էին ՀՅԴ Բիւրոյի ներկայացուցիչը, շրջանիս մօտ Բիւրոյի ներկայացուցիչը և ՀՅԴ Արևելեան ԱՄՆի ու Կանադայի Կենտրոնական Կոմիտէների ներկայացուցիչները։

58-րդ Շրջանային ժողովը գումարւում էր թէ ազգային և թէ ներքին կազմակերպական բացառիկ պայմաններում, երբ մեր հայրենիքը և աշխարհասփիւռ հայ ժողովուրդը կանգնած են գոյաբանական հարցերի դէմ հանդիման և երբ ՀՀ իշխանութիւնները զաւթած խմբակցութիւնը զիջողական քաղաքականութեամբ ծառայութիւն է մատուցում թշնամուն իր հակահայկական, ազգակործան և հայրենակործան քայլերով։

ՀՅԴ Արևմտեան Ամերիկայի 58-րդ Շրջանային ժողովը դատապարտում է ՀՀ ներկայ կառավարութեան ձախողումները հայ ազգը պաշտպանելու իր սահմանադրական պարտականութիւնների մէջ՝ թշնամուն զիջելով Արցախը և ՀՀ ինքնիշխան տարածքներից հարիւրաւոր քառակուսի կիլոմետրներ, անպաշտպան թողնելով արցախահայութեանը, ՀՀ քաղաքացիներին և Բաքուի բանտերում պահւող ռազմաղաքական ղեկավարութեանն ու բանտարկեալներին։

Արևմտեան ԱՄՆ շրջանը յայտնում է իր անմացորդ զօրակցութիւնը՝ հայրենազրկուած մեր Արցախի հայրենակիցներին և ՀՀում ազգային և հայամետ իշխանութեան ձևաւորման ուղղութեամբ ծաւալուող աշխատանքներին։

58-րդ Շրջանային ժողովը բացառիկ էր նաև նրանով, որ շրջանս գալիս էր վերջնական և համապարփակ լուծում տալու ՀՅԴ Արևմտեան շրջանում ծայր առած կազմակերպական տարակարծութիւններին։ Ժողովը մանրակրկիտ կերպով իր գնահատականը տւեց վերոնշեալ հարցերին և միաձայնութեամբ որոշեց վճռական կերպով վերականգնել բնականոն իր գործունէութիւնը և’ ներգաղութային և’ համազգային մեր կեանքից ներս։

Շրջանային ժողովը Հայ Դատի, կազմակերպական, քաղաքական, քարոզչական, տնտեսական և երիտասարդութեան հարցերը քննելով նաև անդրադարձաւ օրէցօր ընդլայնւող գաղութիս նոր պահանջների, նրա ազգային դիմագծի պահպանման, եկեղեցական ու ազգային կեանքի և քոյր կազմակերպութիւնների գործունէութեան աշխուժացման հարցերին և կայացրեց համապատասխան որոշումներ։

Շրջանային ժողովը յառաջիկայ երկու տարիների համար ընտրեց ՀՅԴ Արևմտեան ԱՄՆ շրջանի նոր Կենտրոնական Կոմիտէ:

ՀՅԴ Արևմտեան Ամերիկայի 58-րդ Շրջանային ժողով

Յունիս 30, 2024, Մոնթէ Բելլօ