Այսօր՝ հուլիսի 4-ին Երեւանի Մաշտոցի պողոտայի «Սիզոնսի» այգում տեղի ունեցավ հավաք՝ ի պաշտպանություն գործարար և մեծ բարերար, «Տաշիր» ընկերությունների խմբի և «ՀԷՑ»–ի սեփականատեր Սամվել Կարապետյանի։ Արամ Մանուկյանի արձանի մոտից մեկնարկած երթը միացավ «Սիզոնսի» այգում հավաքված քաղաքացիներին, ինչից հետո տեղի ունեցավ կարճ հանրահավաք, որի ընթացքում ցուցադրվեց ֆիլմ Սամվել Կարապետյանի անցած ուղու մասին:

Հավաքին ներկա էին հոգևորականներ, նրանց թվում էր Հայ առաքելական եկեղեցու Ռուսաստանի և Նոր Նախիջևանի թեմի առաջնորդ Եզրաս արքեպիսկոպոսը։

«Այսօր համախմբվել ենք այստեղ՝ ի պաշտպանություն ազգային բարերար Սամվել Կարապետյանի, որը վերջերս հայտնվեց անազատության մեջ՝ քննադատելով իշխող ուժին»,- իր ելույթում ասաց Գևորգ եպիսկոպոս Սարոյանը։

Նա նաև ընդգծեց, որ վերջին շրջանում հայ եկեղեցու դեմ իրականացվում է հակաքարոզչություն, հալածանք։ Սամվել Կարապետյանի շուրջ տեղի ունեցածն էլ կապված է եկեղեցու դեմ տարվող արշավով:

Ելույթ ունեցան «Տաշիր» ընկերությունների խմբի փոխնախագահ, «ՀԷՑ» ՓԲԸ տնօրենների խորհրդի նախագահ Նարեկ Կարապետյանը փաստաբան Արամ Վարդևանյանը, ՀՀ ԱԺ Հայաստան դաշինքի պատգամավորներ Աղվան Վարդանյանը, Աննա Գրիգորյանը և ուրիշներ:

Ապա հավաքի բազմահազար մասնակիցները Մաշտոցի պողոտայով երթով շարժվեցին դեպի Ազգային անվտանգության ծառայության շենք, որի մեկուսարանում պահվում են Սամվել Կարապետյանը, Բագրատ արքեպիսկոպոս Գալստանյանը և Միքայել արքեպիսկոպոս Աջապահյանը: Երթի առջեւից գնում էին Կարապետյանների ընտանիքի անդամներն ու հոգեւորականները։ Մանակիցները վանկարկում էին «Ազատություն», «Պայքար», «Պայքար մեր ձևով» կարգախոսները:

ԱԱԾ–ի դիմաց ոստիկանական մեծ ուժեր էին բերվել։

ԱԱԾ-ի մոտ հնչեց տերունական աղոթքը, ապա խոստում, որ արդարությունը կվերականգնվի՝ «մեր ձեւով»:

Սամվել Կարապետյանը ԱԱԾ մեկուսարանից ուղերձ է հղել, որն ընթերցեց փաստաբան Արամ Վարդևանյանը։ Ուղերձում մասնավորապես աասվում է, որ Նիկոլ Փաշինյանն ու իր կառավարությունն անելիք չունեն Հայաստանում ու պետք է կապ չունենան հայ ժողովրդի ապագայի հետ:

«Հետագա մեր քայլերի մասին հանդես կգանք հայտարարություններով: Սա մեծ ճանապարհի սկիզբն է»,- լրագրողների հետ զրույցում ասաց Նարեկ Կարապետյանը:

Տեսանյութն՝ այստեղ