Այսօր՝ ապրիլի 23-ին, Հայոց ցեղասպանության 111-րդ տարելիցի նախօրեին, Երևանի Հանրապետության հրապարակից մեկնարկեց ՀՅԴ Հայաստանի Երիտասարդական և Նիկոլ Աղբալյան Ուսանողական միությունների նախաձեռնած ավանդական Ջահերով երթը:

Այս տարի այն կրում էր «Պայքարը շարունակվում է» կարգախոսը։

Երթին մասնակցում էին ՀՅԴ գործիչներ, «Հայաստան» դաշինքի անդամներ, այլ քաղաքական ուժերի ներկայացուցիչներ, հազարավոր քաղաքացիներ:

Ջահերով երթի մեկնարկից առաջ ՀՅԴ Հայաստանի ԳՄ ներկայացուցիչ Իշխան Սաղաթելյանն իր ելույթում ասաց. «Այսօր՝ Հայոց ցեղասպանությունից 111 տարի անց, մենք կանգնած ենք հայկական պետության մայրաքաղաքում հայության անժամանցելի իրավունքները պաշտպանելու, մեր հիշողությանը տեր կանգնելու, Ցեղասպանության զոհերի հիշատակը հարգելու, այլևս երբեք նոր Ցեղասպանություն և հայրենազրկում թույլ չտալու համար։ 111 տարի առաջ մեզ ցանկանում էին բնաջնջել՝ փորձելով ոչնչացնել մեր ինքնությունը։ Ուզում էին, որ մենք մոռանանք մեր խորհրդանիշերը, չխոսենք հայերեն, չերգենք մեր երգերը, ուրանանք մեր պատմությունը»:

Նրա խոսքով՝ Հայոց ցեղասպանությունը մեր 1000-ամյա պատմության մեջ, մեր տեսակի դեմ իրականացված ամենասարսափելի և ամենազազրելի հարձակում էր, որն ապրեց մեր ժողովուրդը ։

«Հայ ժողովուրդը կարողացավ իր մեջ ուժ գտնել, վերականգնվել և պետականություն կառուցել։ Հայկ նահապետից մինչև Ավարայր, Սարդարապատից մինչև Արցախյան ազատամարտ․․․ մեր պայքարի գլխավոր նպատակը եղել է պահել մեր ինքնությունը և հայ մնալ։ Իսկ այսօր՝ ավելի քան մեկ դար անց, մեր վրա հարձակվում են ոչ թե յաթաղանով, այլ ուրացման պարտադրանքով։ Նպատակը նույն է՝ ջնջել հայկական հետքը, վերացնել մեր տեսակը։ Մեզ ստիպում են, որ չոգեշնչվենք Արարատով, մեզ ստիպում են մոռանալ Արցախը և այնտեղ կատարված ոճիրը, մեզ ստիպում են հրաժարվել մեր պետության ծննդյան վկայականից՝ Անկախության հռչակագրից։Եվ սա կատարվում է այն ժամանակ, երբ Արցախում ոչնչացնում են մեր եկեղեցիները,իսկ մեր եղբայրները գտնվում են Բաքվի բանտերում և, փաստացի, շարունակում է Ցեղասպանության քաղաքականությունը։ Այս ամեն ինչն արվում է այս շենքում նստած հանցագործի՝ Փաշինյանի մասնակցությամբ և մեղսակցությամբ»,- նշեց ՀՅԴ ԳՄ ներկայացուցիչը:

Ելույթ ունեցան նաեւ ՀՅԴ անդամ Սեւակ Նազարյանը եւՀՅԴ Հայաստանի Երիտասարդական միության վարչության ներկայացուցիչ Ժորա Ավդալյանը:

Երթի մասնակիցները Հանրապետության հրապարակում այրեցին Թուրքիայի դրոշը, ապա «Պայքար, պայքար» վանկարկումներով ու պահանջատիրական կոչերով շարժվեցին դեպի Ծիծեռնակաբերդի հուշահամալիր։ Նրանք իրենց հետ տանում էին Հայաստանի և Արցախի Հանրապետության, ինչպես նաեւ Հայոց ցեղասպանությունը ճանաչած երկրների դրոշները։

Ծիծեռնակաբերդի հուշահամալիրում երթի մասնակիցները մեկ րոպե լռությամբ հարգեցին Ցեղասպանության ավելի քան 1,5 միլիոն զոհերի հիշատակը եւ ծաղիկներ զետեղեցին անմար կրակի շուրջ: Տեղի ունեցավ հոգեհանգստյան կարգ:

Մանրամասները՝ Երկիր Մեդիայի տեսանյութում