Արթուր Խաչատրյանի խոսքով՝ աշխարհի երկրների մեծամասնությունում գյուղատնտեսության նախարարությունն առանձին նախարարություն է, իսկ ՀՀ-ի պարագայում առանձին գյուղնախարարություն ունենալը շատ ավելի կարևոր է:

«Մեզ մոտ շատ ավելի կարևոր է, քան ԱՄՆ-ում կամ Կանադայում, որովհետև մեր ՀՆԱ-ի 15 տոկոսը գալիս է գյուղատնտեսությունից:

Եթե դրան գումարենք նաև վերամշակվող արդյունաբերությունը, 10 տոկոս էլ դա, այսինքն՝ մոտ 25 տոկոսը գալիս է գյուղատնտեսությունից: Հետևաբար, շատ կարևոր է, որ մենք ունենանք առանձին գյուղնախարարություն: Շատ երկրներում կան գյուղատնտեսության նախարարություններ, որոնց կցված են նաև այլ գործառույթներ, օրինակ՝ գյուղատնտեսության և բնապահպանության, ինչպես Վրաստանում է, կամ գյուղատնտեսության և պարենի և այլն: Այսինքն՝ գյուղատնտեսությունը կարևորվում է որպես առանձին գործառույթ»,- նշեց նախկին գյուղնախարարը:

Արթուր Խաչատրյանը նկատում է նաև, որ նախարարությունների կրճատումից հետո հազարավոր քաղաքացիներ դառնալու են գործազուրկ, առաջանալու է սոցիալական խնդիր:

«Կրճատված մարդկանց ի՞նչ ենք անելու: Պետությունն այդ մարդկանց օգտագործել է, մարդը բուհն ավարտել է, եկել է, աշխատել, պետությունը նրան որոշակի ապահովություն է խոստացել, հիմա ասում է՝ դու ինձ այլևս պետք չես, հանում, դուրս ես շպրտում»,- ասաց նա:

Բացի նախարարությունների կրճատումից, քաղաքական դաշտում քննարկվում է նաև ուժային կառույցների կարգավիճակի հարցը: Մասնավորապես, «Լուսավոր Հայաստան» խմբակցությունն առաջարկում է Ազգային անվտանգության ծառայությանը և Ոստիկանությունը դարձնել նախարարություն, բայց իշխանությունների խոսքով՝ դա կբերի ուժային կառույցների քաղաքականացման: «Իմ քայլը» ևս համաձայն է սուպերվարչապետական համակարգից հրաժարվելուն: Ըստ խմբակցության՝ ուժային կառույցները պետք է վարչապետի ենթակայությունից հանվեն և կառավարության կամ խորհրդարանի հսկողության տակ լինեն:

«Սուպերվարչապետական համակարգը պետք է կազմալուծվի և լինի նորմալ, քաղաքակիրթ վարչապետական համակարգ, այսինքն՝ ուժային կառույցները ենթակա լինեն կառավարությանը: Քաղաքականացվելու հիմնավորումը ինձ համար հասկանալի չէ: Պաշտպանության նախարարությունը կարող է քաղաքականացվել, ոստիկանությունը՝ ո՞չ: Այդ դեպքում ինչու է պաշտպանության նախարարը քաղաքական մարդ, ոչ թե զինվորական: Ոստիկանությունը և ԱԱԾ-ն պետք է լինեն կառավարության կազմում, որպեսզի պատասխանատվություն լինի կառավարության առջև և այդ խողովակով նաև պատասխանատու լինի ԱԺ-ին»,- նշեց Արթուր Խաչատրյանը:

https://youtu.be/uH94hD4Otp0