ՀՅԴ Հայաստանի Գերագույն մարմնի նախաձեռնությամբ, այսօր՝ դեկտեմբերի 6-ին, Դվին հյուրանոցի «Մյուզիք հոլ» սրահում տեղի ունեցավ հանդիսավոր արարողություն՝ նվիրված Հայ Յեղափոխական Դաշնակցության հիմնադրման 135-ամյակին։

Այս տարի այն անցկացվեց «Հանուն հայի, հանուն պետության» կարգախոսի ներքո՝ ընդգծելով ՀՅԴ աշխարհայացքը, գաղափարական հիմքերը և արժեքները:

Ներկա էին ՀՅԴ Բյուրոյի և Հայաստանի Գերագույն մարմնի անդամներ, ՀՀ Ազգային ժողովի պատգամավորներ, կուսակցականներ, համակիրներ, քաղաքական ու հասարակական գործիչներ։

Միջոցառումը մեկնարկեց Հայաստանի ու Արցախի պետական օրհներգերով, հնչեց Հայ Յեղափոխական Դաշնակցության քայլերգը:

Մայր Աթոռ Սուրբ Էջմիածնի Արտաքին հարաբերությունների և արարողակարգի բաժնի տնօրեն Տեր Նաթան արքեպիսկոպոս Հովհաննիսյանը իր խոսքը սկսեց աղոթքով, ապա ներկաներին փոխանցեց Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի օրհնությունը, որում ասվում էր․

«Մենք գոհունակությամբ հիշում ենք և ուզում ենք հիշատակել այս 135 տարիների ճանապարհի մեջ Հայ Յեղափոխական Դաշնակցության կարևոր դերը։ Սա մի առաքելություն, որը սկսվել է 19-րդ դարի վերջին, անցել է ողջ դժվարին 20-րդ դարը և այսօր էլ իր առաքինության կարիքը ունենք։ Հայը եղել է, կա ու կլինի, թող աշխարհն իմանա»։

Ելույթներով հանդես եկան ՀՅԴ Բյուրոյի անդամ, Լիբանանի խորհրդարանի պատգամավոր Հակոբ Բագրատունին և ՀՅԴ Հայաստանի Գերագույն մարմնի ներկայացուցիչ, ՀՀ ԱԺ պատգամավոր Իշխան Սաղաթելյանը։

«Մենք կողմանիկց ենք արժանապատիվ խաղաղության, ոչ թե զիջումներով հայրենակործան պայմանգրերին: Վտանգված է Հայ Առաքելական Եկեղեցին, հայրենիքը, պետությունը»,- իր ելույթում ասաց Հակոբ Բագրատունին:

«Հսկայական խռովքի մեջ են մեր ժողովրդի զավակներից նրանք, որոնք հայի սիրտ են կրում, ապրել են ու մասնակից են եղել հաղթանակների կերտմանն ու այսօր ականատես են եւ հիասթափված են Արցախի հանձնումից մինչեւ Հայաստանում Ադրբեջանի ու Թուրքիայի կամքին ենթակա զիջումներ, Սփյուռքը պառակտող քայլերից, հայրենասիրության ծաղրանքից ու արժեհամակարգի ազգային ըմբռնողության խորտակմամբ: Ընթացքը դադար չունի ու գահավեժ շարունակվում է ՝ թիրախավորելով Հայ Առաքելական եկեղեցին, եկեղեցու սպասավորների նկատմամբ դավադրական քայլերով ժողովրդահաճո հերյուրանք փրփուրներով նպատակ ունենալով փշրել հայ ժողովրդի ու նրա հայրենիքի գոյատեւումն ապահոված ողնաշարը»,-ասաց նա:

Շնորհավորելով ներկաներին՝ Իշխան Սաղաթելյանն իր խոսքում մասնավորապես նշեց. «Դաշնակցությունն անցյալ ունեցող, ներկայով ապրող, ապագայի կազմակերպություն է: Մեր  գաղափարներն այսօր առավել քան պահանջված են, քանի որ Հայաստանը ճակատագրական ջրբաժանի առջև է, իսկ  հայկական ինքնությունը դարձել է համակարգային հարվածի թիրախ՝ թե՛ դրսից, թե՛ ներսից։

Եւ մենք շատ հստակ թե՛ դրսի, թե՛ ներսի հակահայ ուժերին ասում ենք՝  դուք կարող եք հալածել Դաշնակցությանը, դուք կարող եք բանտարկել դաշնակցականներին, սահմանափակել ՀՅԴ գործունեությունը, բայց դուք չեք կարող սպանել դաշնակցականությունը՝ մեր էությունը, տեսակը։ Ավելին, իրականում դուք չե՛ք կարող նույնիսկ խաթարել մեր կազմակերպության գուրծունեությունը։ Դաշնակցության արևը մայրամուտ չունի»:

Միջոցառմանը ցուցադրվեցին փաստավավերագրական ֆիլմեր, որոնք ներկայացնում էին ՀՅ Դաշնակցության անցած ուղին, ազատագրական պայքարի կարևոր հանգրվանները, ինչպես նաեւ ներկայիս գործունեությունը։

Հայ Յեղափոխական Դաշնակցության հիմնադրման 135-ամյակի կապակցությամբ՝ ողջյունի, շնորհավորանքի, գնահատանքի և քաղաքական զորակցության ուղերձներ էին հղել մի շարք կուսակցություններ և միջազգային կազմակերպություններ։

Երեկոյի գեղարվեստական բաժնում հնչեցին ազգային-հայրենասիրական երգեր:

Միջոցառման մանրամասները՝ տեսանյութում