«Բողոքարկելու ենք այդ մեխանիզմը, որ կա և գոյություն ունի», – «Ազատության» «ֆեյսբուքյան ասուլիս» հաղորդման ժամանակ անդրադառնալով պարգևավճարներին, հայտարարեց ՀՅԴ Հայաստանի Գերագույն մարմնի ներկայացուցիչ, ՀՀ ԱԺ փոխնախագահ Իշխան Սաղաթելյանը:

Պատգամավորներն ու Ազգային ժողովի աշխատակիցները խորհրդարանի նախագահի որոշմամբ անկախության 30-ամյակի առթիվ պարգևավճարներն են ստացել։ Օրենսդիրների հաշվեհամարներին այսօր շուրջ 400 հազար դրամ է փոխանցվել:

Սաղաթելյանն ընդգծելով, դա իրենց համար անընդունելի է. «Մենք դա ուղղելու ենք սահմանամերձ գյուղեում սոցիալական ծրագրերի, և առհասարակ բողոքարկելու ենք այդ մեխանիզմը, որ կա և գոյություն ունի»:

«Այնպես չէ, որ մեր ֆրակցիան հարուստների ֆրակցիա է, և այդ գումարի կարիքը բոլորը չունեն: Այո, կան պատգամավորներ, որ չունեն դրա կարիքը, բայց ճնշող մեծամասնությունը ունի: Ես չունեմ այդ գումարի կարիքը, բայց իմ գործընկերները ունեն, բայց նաև իրենք քաջ գիտակցում են, որ կան Հայաստանի Հանրապետությունում սոցիալապես շատ ծանր, իրենց մինիմալ սպառողական զանգվածը ապահովել չկարողացող քաղաքացիներ», – ընդգծեց Սաղաթելյանը:

Հարցին՝ գործուղումները իրենց գրպանի՞ց են անելու, ընդդիմադիր պատգամավորը պատասխանեց, որ միջպետական գործուղումները մեծ ծախսերի հետ են կապված և չեն կարող. «Բայց Հայաստանի տարածքում, այո, փորձելու ենք մեր հնարավորություններով այդ խնդիրները կարգավորել»:

Օգտատերերից մեկի հարցին էլ, թե ո՞րն է ընդդիմության հիմնական նպատակը Ազգային Ժողովում, Սաղաթելյանը պատասխանեց. «Էս օրերին մեզ շատ են քննադատում մանդատները վերցնելու, խորհրդարանում հայտնվելու համար, որովհետև ՀՀ շատ քաղաքացիներ մեզ քվեարկել են այս իշխանությանը հեռացնելու և երկիրը ստեղծված իրավիճակից դուրս բերելու համար, այս պահին քաղաքացիների այդ պահանջը կատարված չէ և կա քննադատություն: Մի մասը մեզնից ակնկալում է օրենսդրական աշխատանք, մի մասը ակնկալում է ավելի բուռն և արմատական պայքար այս իշխանության դեմ: Մենք գտնում ենք՝ քանի այս իշխանությունները կան և գոյություն ունեն, մեր երկրի առաջ կանգնած մարտահրավերները չեն լուծվելու և դրանք գնալով ավելի են խորանալու:

Այս իրավիճակում, երբ թշնամին Հայաստանի Հանրապետության տարածքում արդեն ոստիկանական անցակետ է տեղադրում, գնալ գլուխներս կախ զբաղվել օրենսդրական աշխատանքով, դա կլինի անհասկանալի, անընդունելի և մենք այդ ճանապարհով առնվազն այս թուլում չենք գնալու»:

Նա հավելեց, որ իհարկե, հանդես գալու են օրենսդրական նախաձեռնություններով, բայց դրան զուգահեռ կան երկրին սպառնացող սպառնալիքներ, և այս ուղղությամբ, ըստ Սաղաթելյանի, իրենց անելիքն ավելի մեծ է:

2020թ-ի սեպտեմբերի 27-ին, պատերազմը հայտարարելուց երկու ժամ հետո ՀՅԴ ԳՄ հանդես եկավ հայտարարությամբ՝ ասելով, որ մենք պետության և բանակի կողքին ենք․ հիշեցրեց Իշխան Սաղաթելյանը՝ պատասխանելով օգտատերերից մեկի հարցին, թե վերջին պատերազմի ընթացքում դաշնակցական ղեկավար կազմից քանիսն են մասնակցել։

«Դրանից երեք ժամ հետո Արամ Մանուկյանի արձանի դիմաց Դաշնակցության առաջին վաշտը շարված էր, որը մեկնեց սահման։ Բանակից հետո երկրորդ կազմակերպված ուժը եղել է ՀՅԴ կամավորական խումբը։ Աշխատանքները համակարգել է Հրանտ Մարգարյանը։ ՀՅԴ ղեկավար Սիմոն Սիմոնյանը եղել է առաջնագծում, այդ թվում ԳՄ անդամներ՝ Պետրոս Մեղրյանը, Արթուր Խաչատրյանը, որոնք պարբերաբար այցելել են և ամեն մեկն իր ֆունկցիան է ունեցել։ ՀՅԴ քաղաքական ողջ ղեկավարությունը ներգրավված է եղել այդ պրոցեսին, որոշներն առաջին գծում, որոշները՝ թիկունքում»,- նշեց ԱԺ փոխնախագահը։

Ինչ վերաբերում է իր մասնակցությանն, ապա Իշխան Սաղթելյանը նախ հիշեցրեց, որ 2016 թվականի Ապրիլյան քառօրյա պատերազմի ընթացքում առաջին օրից եղել է առաջնագծում, իսկ այս պատերազմի ժամանակ այլ գործառույթ է իրականացրել։

«Այս պատերազմի ընթացքում ունեցել եմ այլ գործառույթներ։ Լինելով կուսակցության քաղաքական ղեկավարությունում, ունեցել եմ քաղաքական աշխատանքներ կատարելու պարտականություններ։ Զուգահեռ 2 անգամ այցելել եմ Արցախ։ Եղել եմ առաջնագծում՝ զուտ ընկերներիս տեսակցելու։ Դաշնակցությունը չորս վաշտ է ունեցել առաջնագծում։ Նրանց անհրաժեշտ պարագաներով ապահովելու խնդիր է եղել»,- ասաց նա։

Իշխան Սաղաթելյանի փոխանցմամբ՝ պատերազմի 44 օրերի ընթացքում հսկայական քաղաքական աշխատանք են իրականացրել՝ նաև հանդես գալով տարբեր առաջարկություններով, այդ թվում՝ օպերատիվ շտաբ ատեղծելու։

«Ինչ, ինչ, բայց Դաշնակցությանը մեղադրել պատերազմին չմասնակցելու կամ կիսատ մասնակցելու մեջ, չի անցնում։ Այդտեղ մենք առանց աչք թարթելու մեծից փոքր, շարքայինից ղեկավար, առաջին գծում էինք։ Ցավոք, մենք ունեցել ենք զոհեր, 55 դաշնակցական է զոհվել պատերազմի ընթացքում»,- նշեց նա։

Ասուլիսն ամբողջությամբ՝ ստորև.